2016թ. Ոստիկանության ՊՊԾ գունդը գրաված եւ Մի շարք ծանր հանցագործությունների մեջ մեղադրվող «Սասնա ծռեր» խմբի անդամների գործով հերթական դատական նիստում այսօր հրապարակվեց նաեւ ամբաստանյալներից Վարդգես Գեւորգյանի մեղադրական եզրակացությունը: Ըստ դրա՝ Վարդգես Գեւորգյանը, հանդիսանալով ՀՀ ՊՆ X զորամասի հակատանկային դասակի հրամանատար, չարաշահել է իր լիազորությունները եւ պաշտոնեական դիրքն օգտագործելով՝ հուլիսի 20-ին լինելով դիրքի ավագ՝ հենակետից հափշտակել է ռազմամթերք հանդիսացող նռնակ՝ իր պայթուցիչով, խախտել է մարտական հերթապահություն կատարելու կանոնները, լքել է հենակետը (այդ կերպ ՀՀ սահմանի տվյալ հատվածը թողնվել է առանց բավարար հսկողության) եւ փորձել միանալ զենք-շինություններ զավթած եւ պատանդառություն կատարած «Սասնա ծռեր» խմբին:
Նա զանգել է խմբի անդամներից Պավել Մանուկյանին եւ ստանալով նրանից Երեւան գալու համաձայնություն, հուլիսի 20-ին ուղեւորվել է մայրաքաղաք, որպեսզի միանա խմբին, սակայն ճանապարհին բռնվել է իրավապահների կողմից: Այդ ժամանակ նրա մոտից հայտնաբերվել է նաեւ որսորդական մեկ դանակ:
Բացի այդ, ըստ մեղադրական եզրակացության, նա մինչեւ հուլիսի 20-ն ապօրինի ձեռք է բերել ու պահել 1,3 գրամ «մարիխուանա» թմրամիջոց եւ գործարանային արտադրության մարտական փամփուշտներ, պայթուցիչ:
Վարդգես Գեւորգյանը, լսելով մեղադրանքը, ասաց, որ այն չի ընդունում եւ այլ ասելիք չունի:
Ամբաստանյալներից Արմեն Լամբարյանն էլ, որին առաջադրվել է ապօրինի զենք-զինամթերք պահելու, կրելու, շենք-շինություն զավթելու եւ պատանդառություն կատարելու մեղադրանքներ, հայտարարեց, որ ինքն ընդամենն իրացրել է իր՝ ապստամբության դիմելու իրավունքը. «Մեզ սահմանադրական դատարանը կարող է դատել, թե չէ այս դատը ձեւականություն է»:
Լուիզա ՍՈՒՔԻԱՍՅԱՆ
