Եվրոպայի խորհրդի հակակոռուպցիոն մարմինը՝ Կոռուպցիայի դեմ պայքարի պետությունների խումբն այսօր հրապարակել է նոր զեկույց՝ Հայաստանի կողմից խորհրդարանի անդամների, դատավորների և դատախազների շրջանում կոռուպցիայի կանխմանն ուղղված առաջարկությունների իրականացման վերաբերյալ:
GRECO-ն եզրակացրել է, որ Հայաստանը բավարար չափով իրականացրել է 18 հանձնարարականներից 5-ը: Ինչ վերաբերում է մյուսներին, առաջարկներից 12-ն իրականացվել են մասնակիորեն, մեկն ընդհանրապես չի իրականացվել:
GRECO-ն նշել է, որ առաջընթաց չի գրանցվել խորհրդարանում իրավական գործընթացի թափանցիկության և անհամապատասխանությունների վերաբերյալ ստանդարտների մասով:
Զեկույցում նշվում է, որ ավելի շատ ջանքեր են անհրաժեշտ՝ սահմանելու վարքագծի կանոններ խորհրդարանի անդամների համար և ամրապնդելու պատգամավորների էթիկական նորմերին և չափանիշներին վերաբերող ստանդարտները:
Ինչ վերաբերում է դատավորներին, GRECO-ն ողջունում է սահմանադրական ուղղումները, որոնք բարեկարգել են դատական ինքնակառավարումը՝ Բարձրագույն դատական խորհրդի հաստատմամբ: Ավելին, դատավորների անձեռնմխելիությունը սահմանափակվել է մինչև, այսպես կոչված, «ֆունկցիոնալ անձեռնմխելիություն»: Որոշակի առաջընթաց է արձանագրվել դատավորների ընդունման, առաջխաղացման, հեռացման և տեղափոխման ընթացակարգերի մասով, որում Բարձրագույն դատական խորհուրդն ունի առանցքային դեր: Այնուամենայնիվ, ավելի շատ քայլեր պետք է ձեռնարկվեն դատավորների վերապատրաստման և խորհրդատվությունների վրա:
Ինչ վերաբերում է դատախազներին, GRECO-ն ողջունում է Դատախազի գրասենյակի մասին օրենքի ընդունումը. կարևոր քայլեր են ձեռնարկվել դատախազների ընդունման ընթացակարգն ամրապնդելու և դատախազների էթիկայի հանձնաժողովն ամրապնդելու համար:
Այնուամենայնիվ, ավելի շատ միջոցառումներ են անհրաժեշտ ներկայացնելու պարտադիր վերապատրաստումների և գաղտնի խորհրդատվությունների վերաբերյալ:
GRECO-ն նշում է, որ անհրաժեշտ է հետագայում նշանակալից առաջընթացի հասել՝ գալիք 18 ամիսներին հանձնարարականների համապատասխանությունն ընդունելի մակարդակի հասցնելու համար: GRECO-ն Հայաստանի պատվիրակության ղեկավարին հրավիրում է լրացուցիչ տեղեկատվություն ներկայացնել արված առաջարկությունների իրականացման վերաբերյալ ոչ ուշ, քան 2019թ. հունիսի 30-ը:
Պատրաստեց Վիկտորյա ԱՆԴՐԵԱՍՅԱՆԸ
