«Արդարադատության նախարար Դավիթ Հարությունյանն ունի իր կարծիքը եւ ճիշտ չի լինի ասել, որ նրա մոտեցումը հիմք չունի: Նման հիմք կարող է լինել: Բայց այդ դեպքում առաջանալու էր այն մոտեցումը, որ դրանք սահմանադրական էին եւ այդ դեպքում մեծամասնության հանդեպ կարող էր հնչել մեղադրանք, որ փորձել է հեշտ ճանապարհով գնալ: Եվ եթե կա վեճ, տարբեր ընկալում, ապա մեծամասնությունը պետք է գնա բարդ ճանապարհով, որպեսզի չմեղադրվի, որ գնացել է հեշտ ճանապարհով»,- խորհրդարանում, լրագրողների հետ զրույցում ասաց ՀՀ ԱԺ պետաիրավական հարցերի մշտական հանձնաժողովի նախագահ Հրայր Թովմասյանն՝ անդրադառնալով խորհրդարանում առաջացած խառնաշփոթին: Հիշեցնենք, երեկ ԱԺ-ում ՀՀ ԱԴ նախարար Դավիթ Հարությունյանը հայտարարեց, որ «ՀՀ դատական օրենսգրքում փոփոխություններ եւ լրացումներ կատարելու մասին» օրենքի նախագիծը սահմանադրական չէ, մինչդեռ ԱԺ նախագահը հայտարարել էր, որ սահմանադրական է ու այդ կերպ կազմակերպել քվեարկությունը։ Սահմանադրական օրենքի համար պետք է կողմ քվեարկի պատգամավորների 3\5-ը:
Հրայր Թովմասյանը հերքում է լուրերը, որ իր եւ Դավիթ Հարությունյանի միջեւ լարված հարաբերություններ են. «Անձնական հակասություններ բացարձակ չկան: Ես շատ ջերմ ու ընկերական հարաբերություններ ունեմ Դավիթ Հարությունյանի հետ։ Երբ նախարարը գալիս է ԱԺ, իմ կաբինետում է լինում: Մոռացեք, նման բաներ մի փնտրեք»:
Նելլի ԳՐԻԳՈՐՅԱՆ
