«Հրայր Թովմասյանին մեղադրում են, որ ինքը սխալ լուծում է տվել: Ո՛չ, միանշանակ սահմանադրական էր եւ սահմանադրական է այս օրենքը»,- նախկին գլխավոր դատախազ, ՀՀԿ պատգամավոր Գեւորգ Կոստանյանը այսօր ԱԺ-ում իր ելույթում այսպես վստահեցրեց՝ անդրադառնալով այն բանավեճին, թե արդյոք «Դատական օրենսգրքում փոփոխությունների» նախագիծը, որի շուրջ այդքան մեծ աղմուկ բարձրացավ, սահմանադրական էր, թե՞ ոչ: Նա փաստորեն ընդդիմացավ արդարադատության նախարար Դավիթ Հարությունյանին:
Գեւորգ Կոստանյանի խոսքով՝ «Կառավարությունը չի որոշում, թե մենք որ ռեժիմով պետք է օրենքը ընդունենք, կամ չընդունենք: Էդ մե՛նք ենք որոշում եւ մենք էլ որոշել ենք այդպես: Սա սահմանադրական օրենք էր եւ քննարկվել ու քննարկվելու է բացառապես սահմանադրական օրենքին բնորոշ ռեժիմով»:
Նա անդրադարձավ նաեւ Ռուստամ Մախմուդյանի քվեարկության «չարաբաստիկ կոճակին»: Նրա խոսքով՝ ընդունենք, որ Մախմուդյանի եւ եւս մի քանի պատգամավորների կոճակները չեն աշխատում, հո չե՞նք կարող սահմանափակել պատգամավորների քվեարկության իրավունքը, ոչ ոք չի կարող Մախմուդյանին զրկել իր դիրքորոշումն արտահայտելու իրավունքից՝ որեւէ օրենքի վերաբերյալ, եթե կա տեխնիկական խնդիր:
Հռիփսիմե ՋԵԲԵՋՅԱՆ
