Գեւորգ Կոստանյան. «Դավիթ Հարությունյանը հեղինակավոր իրավաբան է, բայց մենք էլ կարծիք ունենք» (Տեսանյութ)

«Դավիթ Հարությունյանն իմ քավորն է. եւ կնունքի, եւ հարսանիքի: Դավիթ Հարությունյանի նկատմամբ միշտ խորին հարգանք ունեցել եմ եւ ունենալու եմ: Իրավաբանության առումով, ես իմ առաջին պաշտոնը զբաղեցրել եմ Դավիթ Հարությունյանի պաշտոնավարման…, հետեւաբար, եթե շատ փորձեք իմ եւ Դավիթ Հարությունյանի միջեւ անձնական ինչ-որ խնդիր տեսնել, համոզված եղեք, անհնար է, անտրամաբանական  է ու անբարոյական»,- խորհրդարանում լրագրողների հետ զրույցում ասաց ՀՀԿ խմբակցության պատգամավոր Գեւորգ Կոստանյանը:

Հարցերը երեկ կայացած վիճելի քվեարկության մասին էին եւ այն մասին, որ Դավիթ Հարությունյանի ու Հրայր Թովմասյանի անձնական հակասությունները «ջրի երես դուրս եկան» այդ քվեարկությամբ: Խնդիրն այն է, որ դատական օրենսգրքում լրացումներ եւ փոփոխություններ կատարելու քվեարկությունը ԱԺ նախագահը հայտարարեց սահմանադրական, ինչի արդյունքում ՀՀԿ-ն անցկացրեց նախագիծը, մինչդեռ, ավելի ուշ, Դավիթ Հարությունյանը հայտարարեց, որ այն սահմանադրական չէ`անհարմար վիճակի մեջ դնելով ՀՀԿ խմբակցությանը:

Գեւորգ Կոստանյանն ասում է`մասնագիտական տարբեր մոտեցումներ են, որոնք իրենք միշտ էլ ունեցել են եւ կունենան. «Դավիթ Հարությունյանը լուրջ իրավաբան է, հեղինակավոր իրավաբան է, բայց մենք էլ կարծիք ունենք»:

Մանրամասները`տեսանյութում

Նելլի ԳՐԻԳՈՐՅԱՆ