«Ավտովարորդների լիգայի պաշտպանություն» ՀԿ նախագահ՝ Տիգրան Հովհաննիսյանը մտահոգված է, եկող տարվա ապրիլի 1-ից ժամանակավորապես կարգելվի ոչ միայն աջ ղեկով մեքենաների ներկրումը Հայաստան, այլեւ փոքր ձեռներեցներին կարգելեն ընդհանրապես մեքենա ներկրել:
«Միայն աջ ղեկով մեքենաների հարցը չէ, բացահայտել ենք, որ խոշոր ներկրողները պատրաստվում են հունվարի մեկից հետո որպես դիստրիբյուտորներ գրանցեն իրենց իրավունքը մաքսային մարմիններում ու փոքր ձեռներեցների ներմուծումը Հայաստան արգելվի: Բացի այդ, այսուհետեւ, եթե ֆիզիկական անձով ես ներկրում, հարկային օրենսգրքով ավելացվել է դրույթ, որ եթե երեք ամսում վաճառես մեքենան, պետք է տասը տոկոս եկամտահարկ վճարես, մենաշնորհ է ձեւավորվում»,- այսօր «Նոյան տապան» ակումբում ահազանգեց Տիգրան Հովհաննիսյանը:
Նրա տեղեկություններով, խոշոր ավտոներկրողները հանդիպում են ունեցել վարչապետի հետ իրենց հարցերը լուծելու համար. «Անհարգալից վերաբերմունք է, գոնե մեկ անհատի չկանչեցին իրենց քննարկումներին, այնինչ 15-20 մլրդ դրամի շրջանառությունը միայն փոքր ներկրողների կողմից է իրականացվել… աղքատությունը բոլոր հարցերի պատասխանը տալիս է, ժողովուրդն այս բնագավառում բիզնես է իրականացնում իրենց սոցիալական խնդիրները լուծելու համար, պարոն մեր վարչապետը կկոչվի երկրորդ բիզնես ցեղասպանը, առաջինը նախորդ վարչապետ Տիգրան Սարգսյանն էր, որը բիզնեսի ցեղասպանությունը սկսեց տարիներ առաջ»:
Արփինե ՍԻՄՈՆՅԱՆ
Լուսանկարը՝ «Նոյան տապանի»
