Կառավարությունը նախատեսում է ԱԺ պատգամավոր Գագիկ Ծառուկյանի ընտանիքին պատկանող «Մուլտի Սոլար» ընկերությանն արտոնություն տալ եւ ՀՀ ներմուծվող ապրանքների մաքսատուրքից ազատել:
Այս մասին տեղեկանում ենք կառավարության վաղվա՝ դեկտեմբերի 21-ի նիստի օրակարգից:
Ըստ որոշման նախագծի, կառավարությունը կբավարարի «Մուլտի Սոլար» ՍՊԸ-ի հայտը, որով առաջարկվում է գերակա ոլորտում իրականացվող ներդրումային ծրագրի շրջանակներում ներմուծվող տեխնոլոգիական սարքավորումները ներմուծման մաքսատուրքից ազատել:
Նախագծում նշված է՝ ներմուծվող ապրանքները չեն ներմուծվում ԵԱՏՄ անդամ երկրներից, քանի որ, ըստ ընկերության, չեն արտադրվում ԵԱՏՄ անդամ երկրներում։
«Մուլտի Սոլարը» նախատեսում է Չինաստանից ներմուծել ընդհանուր 74 միլիոն 126 հազար 430 դրամի սարքավորումներ եւ դրանց բաղկացուցիչ մասերը:
Այս ընկերությունը ներմուծվող ապրանքներն օգտագործելու է արեւային վահանակների արտադրության եւ արեւային համակարգերի տեղադրման համար:
«Մուլտի Սոլարը» վստահեցնում է՝ ներդրումային ծրագրի շրջանակներում նախատեսվում է իրականացնել շուրջ 967 միլիոն դրամի ներդրումներ եւ ստեղծել 49 նոր աշխատատեղ ծրագրի իրականացման առաջին տարում, ապա աշխատակիցների թիվն աստիճանաբար հասցնել 97-ի։
Բացի այս, ինչպես ընկերությունն է ներկայացնում, ծրագրով նաեւ նախատեսված արտադրանքի ծավալները կկազմեն 2,4 միլիարդ դրամ, որից 242,5 միլիոն դրամը կիրացվի ՀՀ տարածքում, 727,5 միլիոն դրամը՝ ԵԱՏՄ այլ անդամ երկրներում, իսկ 1455,0 միլիոն դրամը՝ 3-րդ երկրներում, մասնավորապես՝ ԱՄՆ տարածքում։
Նելլի ԲԱԲԱՅԱՆ
