«Գյումրին առանց տնակների» հիմնադրամն այսօր 27-րդ սոցիալական բնակարանը նվիրեց Ալեքյանների 4 հոգանոց ընտանիքին: Բնակարանը երեք սենյականոց է, գտնվում է Անի թաղամասում, ձեռք են բերել 12 հազար ԱՄՆ դոլարով:
Ինչպես մեզ հետ զրույցում տեղեկացրեց հիմնադրամի գործադիր տնօրեն Ղարիբ Հարությունյանը, ի տարբերություն նախորդ բնակարանների, այն ձեռք է բերվել ոչ թե մեկ բարերարի միջոցներով, այլ տարբեր բարեգործական միջոցառումներից ստացված հասույթից. մասնակցություն են ունեցել նաև Գյումրու քաղաքապետն ու քաղաքապետարանի անձնակազմը:
«Գյումրին առանց տնակների» հիմնադրամի ներկայացուցիչները՝ հոգաբարձուների խորհրդի նախագահ Միքայել եպիսկոպոս Աջապահյանի գլխավորությամբ, նախ այցելեցին Բարեկամության այգի՝ հետևելով տնակներից մեկի քանդման աշխատանքներին: Հիշեցնենք, որ հիմնադրամը նախևառաջ բնակարաններով է ապահովում Բարեկամության այգում բնակվող անօթևաններին՝ րոպե առաջ փորձելով տնակներից ազատել քաղաքի այս գողտրիկ հատվածը:
Այսօրվա բնակարանամուտին մասնակցում էին քաղաքապետարանի աշխատակիցներ, Հովհաննես Շիրազի տուն-թանգարանի տնօրեն Արա Պապանյանը, ավագանու անդամներ, արվեստագետներ՝ քանդակագործ Արտուշ Պապոյանը, օպերային երգչուհի Արևիկ Թանաշեանն իր ամուսնու ու պրոդյուսերի՝Վիգեն Թանաշեանի հետ: Երգչուհին ևս իր լուման է ունեցել բնակարանի ձեռքբերմանը՝ այս նպատակի համար տալով բարեգործական համերգ:
Բնակարանամուտը նշելիս՝ Սրբազանը նրան խնդրեց մի ուրախ երգ երգել:
https://www.youtube.com/watch?v=x42RfaUTiRI&feature=youtu.be
Տանտիրուհին՝ Արսինե Ալեքյանն Aravot.am-ի հետ զրույցում կիսվեց իր ապրումներով: «Բարեկամության այգին տնակներից ազատում են, հերթով բնակարաններ են հատկացնում: Առավոտ կանուխ ինձ զանգ եկավ, վերցրեցի հեռախոսը, «Գյումրին առանց տնակների» հիմնադրամի գործադիր տնօրեն Ղարիբ Հարությունյանն էր: Բարի լույսը սկսեց բարի լուրով, ասաց՝ գիտեք, օրը ձեզ համար ուրախ է սկսվելու, բնակարան ենք ձեզ գնել: Անակնկալի էի եկել…Անտանելի է այլևս տնակներում ապրելը, 29 տարի տնակի մեջ՝սարսափելի վիճակում ու հետո այս բնակարանը: Չեմ էլ ուզում հիշել տնակը: Չեք պատկերացնի՝ ինչքան շնորհակալ եմ: Թող տարոսը մյուս անօթևաններին լինի, թող քաղաքում ոչ մի տնակ չմնա»:
Նունե ԱՐԵՎՇԱՏՅԱՆ
