2016թ. ոստիկանության ՊՊԾ գունդը գրաված եւ մի շարք ծանր հանցագործությունների մեջ մեղադրվող «Սասնա ծռեր» խմբի անդամներից Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի եւ Էդվարդ Գրիգորյանի գործով հերթական դատական նիստում այսօր ամբաստանյալներից Սմբատ Բարսեղյանի շահերի պաշտպան, փաստաբան Հայկ Ալումյանը հանդես եկավ հայտարարությամբ՝ դատավոր Մեսրոպ Մակյանին տեղեկացնելով, որ պաշտպանյալի իրավունքները ոտնահարվում են:
Ալումյանը նշեց՝ Բարսեղյանին ՔԿՀ-ից դատարան բերելիս նրա ձեռքից խլել են նոթատետրը, որում նա քրեական գործին առնչվող գրառումներ է կատարել: Ալումյանը միջնորդեց նիստը հետաձգել, որպեսզի միջադեպը հարթվի, եւ իր պաշտպանյալի իրավունքները վերականգնվեն, սակայն միջնորդությունը չհասցրին անգամ քննարկել: Խոսափողներն ամբաստանյալների դիմացից վերցրին, քանի որ Սմբատ Բարսեղյանը շարունակ տեղից խոսում էր:
«Տետրս ուզում էին խլել, ստիպված թողեցի խցում: Ոստիկանները շատ են հղփացել…»,-ասում էր նա:
Առանց դատավորի թույլտվության տեղից խոսելու համար Սմբատ Բարսեղյանն արժանացավ նախազգուշացման: Նիստն ընդմիջվեց, որպեսզի լարված մթնոլորտը հանդարտվի:
Լուիզա ՍՈՒՔԻԱՍՅԱՆ
