Բոյկոտից հետո ԱԺ նիստերի դահլիճ են վերադարձել «Ելք» եւ «Ծառուկյան» խմբակցությունների պատգամավորները: Խորհրդարանում քննարկվում է «Դատական օրենսգիրքը», որը սահմանադրական օրենք է:
Խմբակցության անունից ելույթ ունենալով՝ Նիկոլ Փաշինյանը նորից նկարագրեց, թե ինչ կատարվեց քվեարկության ժամանակ, վստահեցրեց, որ «Դատական օրենսգրքում փոփոխություններ եւ լրացումներ կատարելու մասին» օրենքը չի ընդունվել, մեջբերումներ արեց ԱԺ կանոնակարգ օրենքից: Նիստերի դահլիճում Փաշինյանն ու Արմեն Ռուստամյանը տեղից սկսեցին վիճել իրար հետ:
Ի պատասխան՝ Շարմազանովն ասաց, որ ոչ մի խախտում չի եղել եւ օրենքն ընդունվել է, իսկ «Ծառուկյան» խմբակցության որեւէ պատգամավոր՝ սկսած Նապոլեոն Ազիզյանից, որն ասում է, թե չի քվեարկել, բայց կողմի կոճակն է սեղմվել, քվեարկության ժամանակ որեւէ ձայն չեն հանել, հետո են բողոքել:
Ամփոփելով վեճը՝ արդարադատության նախարար Դավիթ Հարությունյանն ասաց, որ դա սահմանադրական օրենք չի եղել, այսինքն, այդ օրենքը կարող էր ընդունվել նաեւ 54 ձայնով, ոչ թե 63:
Այժմ քննարկվում է «Սահմանադրական դատարանի մասին» օրենքը:
Հռիփսիմե ՋԵԲԵՋՅԱՆ
