Դեկտեմբերի 20-ին Բյուրականի աստղադիտարանի տնօրեն Արեգ Միքայելյանը «Տեսակետ» ակումբում խոսեց այն թեմայով, թե ինչպիսին էր անցնող տարին Բյուրականի աստղադիտարանի համար, անդրադարձավ հայկական աստղագիտության դերին միջազգային ասպարեզում, նաեւ կարեւորագույն սպասվող միջոցառումներին:
Նրա ձեւակերպմամբ, իրադարձություններով հարուստ տարի է եղել ոչ միայն աստղադիտարանի համար, այլեւ միջազգային աստղագիտական ձեռքբերումների առումով:
«Ինչպես միշտ, վերջին տարիներին էլ Բյուրականի աստղադիտարանի հիմնական թեմաները եղել են տիեզերական անկայուն երեւույթների ուսումնասիրությունները` նոր փոփոխական աստղեր, ակտիվ գալակտիկաների հայտնաբերում եւ այլն, կանոնավոր աշխատել են երկու դիտակները 2.6 մ եւ 1մ Շմիդտի դիտակը, որի վրա համատեղ ծրագիր կա Ռուսաստանի հետ»,-ասաց աստղադիտարանի տնօրենը: Նա տեղեկացրեց աստղադիտարանի կառուցվածքային փոփոխությունների, մասնավորապես Գիտական խորհրդի նոր կազմի մասին:
Մանրամասները՝ տեսանյութում
Պարոն Միքայելյանը նշեց, որ ստեղծել են պատմամշակութային աստղագիտության բաժին, ինչը ղեկավարում է հայտնի տոմարագետ Գրիգոր Բրուտյանը, այժմ կան նաեւ աստղային ինֆորմատիկայի եւ հասարակական կապերի բաժիններ:
2015 թ.-ից Հայաստանը մրցութային սկզբունքով պաշտոնապես դարձել է աստղագիտության տարածաշրջանային կենտրոն: Այս առումով, Արեգ Միքայելյանը կարեւորում է Թուրքիայի ներգրավումը այդ կենտրոնում: «Թուրքիան ընդունել է Հայաստանի գերակայությունը աստղագիտության ոլորտում, եւ իրենց նույնպես ներգրավել ենք աշխատանքներում: Մենք իրավունք չունենք որեւէ երկրի մասնակցություն սահմանափակել, անգամ՝ եթե դա լինի Ադրբեջանը: Կարեւորն այն է, որ Հայաստանը տարածաշրջանի բոլոր երկրների մեջ աստղագիտության ոլորտում համարվում է մակարդակով ամենաբարձրը»,- փաստեց Բյուրականի աստղադիտարանի տնօրենը:
«Մենք առաջին քայլն արել ենք, հիմա պետք է այնպես անենք, որ Թուրքիայի հասարակությունը գիտակցի, որ պետք է ճանաչել Ցեղասպանությունը, ինչպես Գերմանիան դա արեց Հոլոքոստը ճանաչելով»,-հավելեց նա:
Մանրամասները՝ տեսանյութում`
Խոսք գնաց նաեւ աստղագետների աշխատավարձերից ու գործողումներից: Արեգ Միքայլելյանը նշեց, որ աստղադիտարանի աշխատողների բազային աշխատավարձը նվազագույնից է սկսվում` 58000 դրամ, իսկ ամենաբարձր աշխատավարձը` հարկերը ներառյալ, 180000 դրամ է: Սակայն թեմատիկ ֆինանսավորման եւ միջազգային գրանտային ծրագրերի մեջ ընդգրկվածների աշխատավարձը կազմում է 300 000-400000 դրամ:
Նրանից տեղեկացանք, որ Բյուրականի աստղադիտարանը 53 միջազգային գործուղում է ունեցել, բազմաթիվ երիտասարդներ մեկնել են տարբեր երկրներ: Բյուրականի աստղադիտարանում եւս մի շարք գիտաժողովներ են անցկացվել:
Մանրամասները` տեսանյութում
Գոհար ՀԱԿՈԲՅԱՆ
