2017թ. ձմեռային զորակոչի ընթացքում քաղաքացիների դիմումների և բողոքների քննարկման հանձնաժողովն այսօրվանից ընդունում է դիմումատուներին: Նրանց թվում էր Արուսյակ Պետրովան: Նա պնդեց, որ որդու՝ Սերժիկ Քամալյանի առողջական վիճակը մտահոգիչ է, մինչդեռ բժշկական հետազոտությունների «չափազանց մեղմ արդյունքներով» նա ճանաչվել է ծառայության համար պիտանի:
Արուսյակ Պետրովան հանձնաժողովի անդամներին հայտնեց, որ որդին ունի աչքերի ցավ, ձեռքերի դող, որը հատկապես արտահայտվում է ֆիզիկական աշխատանքից հետո, ցածր աշխատունակություն, հարթաթաթություն: Նրա մոտ ախտորոշվել է «կիֆոզ», իսկ հարթաթաթությունը երկկողմանի-երկայնակի է՝ առանց ֆունկցիայի խանգարման: «Չափազանց մեղմ են ամեն ինչ ձեւակերպել»,-դժգոհեց մայրը:
Հանձնաժողովի նախագահ, ՀՀ պաշտպանության նախարարի խորհրդական Գեղամ Հարությունյանը հետաքրքրվեց՝ ի՞նչ հիմք կա չվստահելու բժշկական հետազոտությունների առկա արդյունքներին: Մայրն ասաց. «Բավարար ուշադրության արժանացել ենք, բայց ոչ՝ բուժման»:
Հանձնաժողովի մասնագետները զննեցին զինակոչիկին: Նա էլ իր հերթին ասաց, որ «մեջքը դուրս է ընկած»:
Քննարկելով դիմումը՝ հանձնաժողովականները որոշեցին, որ Սերժիկ Քամալյանը պիտանի է ծառայության համար եւ կարիք չկա միջնորդել ՀՀ կենտրոնական բժշկական հանձնաժողովին, որպեսզի վերջինս նրան լրացուցիչ հետազոտությունների ուղարկի:
Գեղամ Հարությունյանը նկատեց՝ կառավարության համապատասխան որոշմամբ՝ նախազորակոչային եւ զորակոչային տարիքի տղաները ենթակա են անվճար բուժման, եւ ծնողը կարող էր օգտվել այդ հնարավորությունից: «Հետազոտությունների արդյունքներին չվստահելու հիմքեր ծնողի կողմից չներկայացվեցին»,-ասաց նա:
Հավելենք, որ հանձնաժողովի նիստերը կանցկացվեն Մոսկովյան 5 հասցեում գտնվող հասարակական խորհրդի աշխատավայրում՝ երկուշաբթի և հինգշաբթի օրերին` ժամը 10:00-ից:
Լուիզա ՍՈՒՔԻԱՍՅԱՆ
