Ինչպես արդեն տեղեկացրել ենք, խորհրդարանում, Սահմանադրական օրենք Դատական օրենսգրքում փոփոխություններ եւ լրացումներ կատարելու նախագծի քվեարկության ժամանակ միջադեպ տեղի ունեցավ: Օրինագծի ընդունման համար անհրաժեշտ էր 63 «կողմ» ձայն: Քվեարկության արդյունքներով ստացվեց 61 «կողմ» ձայն: ԱԺ նախագահ Արա Բաբլոյանը հայտարարեց, որ ՀՀԿ-ական պատգամավոր Ռուստամ Մախմուդյանի քվեարկության կոճակը չի աշխատել: Վերջինս «կողմ» է նախագծին: «Կողմ» է քվեարկել նաեւ հանրապետությունից բացակայող Արփինե Հովհաննիսյանը: Նա ստորագրություն է թողել: Ստացվեց, որ հիմնական խնդիրը «Ծառուկյան» խմբակցության պատգամավոր Նապոլեոն Ազիզյանի քվեարկության հետ էր:
«Ելք»-ի պատգամավորները պնդում էին, որ նա քարտուղարությունում հայտարարել է, որ հանեն իր քվեարկությունը: Իր ձայնը «կողմ» քվեարկածների մեջ էր`ապահովելով նախագծի ընդունումը:
«Ծառուկյան» դաշինքը չէր մասնակցում քվեարկությանը: Ուշագրավ էր, որ խորհրդարանի դահլիճում այդ երկարատեւ վեճի ժամանակ Նապոլեոն Ազիզյանը դահլիճում էր, բայց ոչինչ չասաց: Այս առիթով նիստերի դահլիճում նաեւ «Ծառուկյան» դաշինքը լռեց:
Aravot.am-ին հայտնի դարձավ, որ Նապոլեոն Ազիզյանը դահլիճում ոչ թե լռել է, այլ նախատել «Ելք»-ի պատգամավորներին`ասելով. «Ախպեր, բայց դուք խի՞ եք իմ փոխարեն խոսում»: «Ելք» խմբակցության պատգամավոր Արամ Սարգսյանն Aravot.am-ի հետ զրույցում ասաց, որ ինքը նման բան չի լսել, սակայն, իր համար տարօրինակ էր, որ «Ծառուկյան» դաշինքի պատգամավորները պարզաբանում չներկայացրեցին նիստերի դահլիճում:
«Ելք» խմբակցությունն ապօրինի որակեց կատարվածը եւ լքեց դահլիճը: Դահլիճը լքեցին նաեւ «Ծառուկյան» խմբակցության պատգամավորները: Նրանք գնացին խմբակցություն`հասկանալ-վերլուծելու համար կատարվածը:
Մանրամասները`տեսանյութում
«Ելք» խմբակցության պատգամավոր Էդմոն Մարուքյանը լրագրողների հետ զրույցում իր վրդովմունքը հայտնեց, որ սահմանադրական օրենքն այսպիսի կեղծիքով է ընդունվում: Էդմոն Մարուքյանն ասում է, որ այս ամենը ցույց տվեց, որ «հեքիաթ» են բոլոր այն խոսակցությունները, որ սահմանադրական կառավարման համակարգում ընդդիմությանը հնարավորություններ են տալու: Այդ պահին դահլիճից դուրս եկավ ՀՀԿ խմբակցության պատգամավոր Արմեն Աշոտյանը: Նա չցանկացավ մեկնաբանել կատարվածը: «Թողեք աշխատենք»,- ասաց եւ շտապեց ԵՄ-Հայաստան խորհրդարանական համագործակցության հանձնաժողովի 17-րդ նիստին:
Մանրամասները`տեսանյութում
Նելլի ԳՐԻԳՈՐՅԱՆ
