Ինչպես տեղեկացրել ենք, քիչ առաջ ԱԺ-ում Դատական օրենսգրքում փոփոխություններ եւ լրացումներ կատարելու նախագծի քվեարկության ժամանակ արտառոց իրավիճակ ստեղծվեց եւ «Ելքը» լքեց նիստերի դահլիճը: Խմբակցությունը պահանջում էր, որ նորից քվեարկեն սահմանադրական այդ օրենքը, քանի որ քվեարկության արդյունքներով այն չէր անցել, «Ծառուկյան» խմբակցության պատգամավոր Նապոլեոն Ազիզյանը սխալմամբ կողմ է քվեարկել, բայց միանում է խմբակցության դիրքորոշմանը եւ չի ուզում մասնակցել:
Իսկ «Ծառուկյան» խմբակցության քարտուղար Վահե Էնֆիաջյանը հայտարարեց, որ անընդունելի է քաղաքական մեծամասնության այդ պահվածքը՝ անցկացնել օրենքը, երբ համապատասխան ձայներ չեն ապահովել: Էնֆիաջյանը հրապարակեց Նապոլեոն Ազիզյանի գրավոր դիմումը, որտեղ նա գրել է, որ քարտուղարությանը ներկայացրել է իր դիրքորոշումը: Այն կոճակը, որը սեղմել է, եղել է տեխնիկական սխալ: «Ծառուկյան» խմբակցության պատգամավորները նույնպես բոյկոտեցին արտահերթ նիստը: Ի պատասխան՝ ԱԺ նախագահ Արա Բաբլոյանը պատասխանեց, որ իրենք շարժվել են ԱԺ կանոնակարգ օրենքով: Նապոլեոն Ազիզյանը այդ պահին չի հայտարարել, որ սխալմամբ է քվեարկել:
Ավելի ուշ արդարադատության նախարար Դավիթ Հարությունյանը իր զարմանքը հայտնեց, որ պատգամավորները աղմուկ են բարձրացրել մի օրենքի նախագծի կարգավորումների շուրջ, որը քվեարկվող օրենքում չի եղել: Նրա խոսքով՝ «Ցավում եմ, որ նման վրիպումներ տեղի են ունենում այս դահլիճում եւ մարդիկ չեն իմանում, թե որ օրենքի նախագծին են քվեարկում: Ես խորապես համոզված եմ, որ այն օրենքը, որը քվեարկվել է, սահմանադրական չի, սահմանադրական է այն օրենքը, որ ես հիմա ներկայացնելու եմ»:
Դավիթ Հարությունյանը նոր միայն զեկուցում է առաջին ընթերցմամբ այն օրենքը, որի դեմ բողոքել եւ բոյկոտել են պատգամավորները: Հիշեցնենք, որ ԱԺ նախագահն ինքը հայտարարեց, որ դա սահմանադրական օրենք է եւ համապատասխան ձայներ պետք է ապահովեն, որ օրենսգիրքն ընդունվի:
Հռիփսիմե ՋԵԲԵՋՅԱՆ
