«Ռուսաստանում մեկնաբանների մի խավ կա, որոնք պատրաստ են մեկնաբանել ամեն ինչ, ընդ որում` մեծ ինքնավստահությամբ։ Բայց հայկական ԶԼՄ-ներն էլ էին փորձում այդ մեկնաբանությունները վերագրել Ռուսաստանին։ Տարատեսակ ենթադրություններ արվեցին, թե իբր այդ ամենը իշխանությունն է ասում։ Վիրավորական արտահայտություններ հնչեցին Ռուսաստանի հասցեին։ Բայց կարծում եմ` նման հարցերին պետք է հանգստությամբ վերաբերվել։ Ճիշտ այնպես, ինչպես մենք հանգստությամբ վերաբերվեցինք ԵԱՏՄ-ից դուրս գալու քննարկմանը, որն անցկացվեց Հայաստանի Ազգային ժողովում»,- այսօր «Sputnik Արմենիա» մամուլի ակումբում կազմակերպված տեսակապի ընթացքում ասաց ՌԴ Պետդումայի պատգամավոր Կոնստանտին Զատուլինը՝ անդրադառնալով ռուսական լրատվամիջոցների անդրադարձին ՀՀ-ԵՄ համաձայնագրի ստորագրմանը:
Ըստ նրա՝ հայ- ռուսական հարաբերությունների մասին սխալ է դատել վերջին շաբաթներին հնչած կտրուկ հայտարարություններով։
Նա համաձայնեց, որ Հայաստանի և Եվրամիության համաձայնագրից հետո ռուսաստանցի որոշ փորձագետների ու մեկնաբանների մեկնաբանությունները երբեմն գռեհիկ էին, շատ զգացմունքային, բայց միաժամանակ նկատեց, որ տհաճ էջն արդեն փակված է, իսկ փոխադարձ մեղադրանքներ էլ այլևս չեն հնչում:
Արփինե ՍԻՄՈՆՅԱՆ
