«Լեռնային Ղարաբաղի հակամարտության կարգավորման հարցում լուրջ առաջընթաց չեմ կանխատեսում մոտ ժամանակում: Կարծում եմ` դա երկարատև գործընթաց է: Ներկայիս տրամադրվածության, այդ թվում և Ադրբեջանում, այդ երկրի ղեկավարության մոտ առկա տրամադրվածության պարագայում դժվար է նման բան ակնկալել»,- այսօր «Sputnik Արմենիա» մամուլի ակումբում կազմակերպված տեսակապի ընթացքում ասաց ՌԴ Պետդումայի պատգամավոր Կոնստանտին Զատուլինը:
Ըստ նրա, Ադրբեջանն իր հռետորաբանությամբ ինքն իրեն դրել է փակուղում ու չի կարողանում այդտեղից դուրս գալ, իսկ նման կերպով արգելափակում է Լեռնային Ղարաբաղի հակամարտության խաղաղ կարգավորման հեռանկարը:
«Ես Լեռնային Ղարաբաղը դիտարկում եմ որպես ինքնորոշված տարածք և հակված չեմ մտածել, որ այն երբևէ, որևէ հանգամանքների պայմաններում կվերադառնա Ադրբեջանի կազմ: Դա, իմ կարծիքով, դեպքերի զարգացման բացարձակ անհնար տարբերակ է»,- շարունակեց ՌԴ պատգամավորը:
Զատուլինի համոզմամբ, եթե Ռուսաստանն ու Արևմուտքը վստահեն միմյանց, կկարողանան արցախյան հարցի լուծման մասին հայտարարել:
Արփինե ՍԻՄՈՆՅԱՆ
