«Հայաստանը շատ հավակնոտ բարեփոխությունների շրջանակ է նախաձեռնել, որոնք վերաբերում են տարբեր ոլորտներին` մարդու իրավունքներից մինչև տնտեսության զարգացում: Որպես ԵՄ՝ մենք առաջնահերթ ենք համարում ֆինանսական օժանդակություն ցույց տալ այս գործընթացում»,- խորհրդարանում, ԵՄ-Հայաստան խորհրդարանական համագործակցության հանձնաժողովի 17-րդ նիստում ասաց ՀՀ-ում ԵՄ պատվիրակության ղեկավար, դեսպան Պյոտր Սվիտալսկին`հավելելով, որ ԵՄ-ն նախատեսում է զարգացման աջակցության ոլորտների համար Հայաստանի հատկացումների չափը ավելացնել 20-25 տոկոսով:
«Այս համաձայնագիրը կօգնի խորացնել մեր երկխոսությունը բոլոր ոլորտներում: Պետք է նշեմ նաեւ, որ Հայաստանը առաջին պետությունն է արեւելյան գործընկերության պետություններից, որը բանակցեց ԵՄ հետ՝ նոր տեսակի փաստաթուղթ ավիացիոն ընդհանուր տարածքի համաձայնագիր ստորագրելով, ինչը նույնպես շատ կարևոր օգուտ կարող է բերել մեր հարաբերություններին»,- ասաց դեսպան Սվիտալսկին`նկատի ունենալով ԵՄ-ՀՀ օրերս ստորագրված համաձայնագիրը:
ՀՀ փոխարտգործնախարար Կարեն Նազարյանն էլ իր ելույթում հայտարարեց, որ հայկական կողմը անելու է ամենը, որպեսզի մինչեւ 2018-ի գարուն Համապարփակ եւ ընդլայնված գործընկերության համաձայնագիրը վավերացվի ՀՀ խորհրդարանում: Ավելի ուշ, լրագրողների հետ զրույցում, Կարեն Նազարյանը մանրամասնեց`կարծում են, որ այդ ժամանակահատվածում հնարավոր է անցնել նախատեսվող ընթացակարգերը`ՍԴ եւ այլն:
Նելլի ԳՐԻԳՈՐՅԱՆ
