ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը կարծում է, որ ԵՄ-ի հետ Հայաստանի համագործակցության հիմքում միայն շահեր չեն դրված, այլ եվրոպական քաղաքակրթությանը հաղորդակից դառնալը: ՀՀ-ԵՄ համագործակցության անկյունաքարը նա համարում է Հայաստանի եւ Եվրոպայի քաղաքացիների համար հանրային բարիք ստեղծելը: Իր մոտեցումներն Արմեն Աշոտյանն այսօր բարձրաձայնեց Հայաստանի խորհրդարանում մեկնարկած ԵՄ-Հայաստան խորհրդարանական համագործակցության հանձնաժողովի 17-րդ նիստի ժամանակ:
Նա ընդգծեց`Հայաստանի արտաքին օրակարգում առաջնային է մնում անվտանգության խնդիրը. «Ուղղակի պետք է նայել քարտեզին եւ հասկանալ, որ մեր ապագայի խնդիրը շաղկապված է սեփական երկրում սեփական պետություն ունենալու ձգտման հետ: Այս համատեքստում Հայաստան-ԵՄ համաձայնագիրը տարածաշրջանում լրացուցիչ կայունության գործոն կարող է լինել: Այս տեսակետից Արցախյան հիմնախնդրի կարգավորման ՄԽ առաջադրված սկզբունքներն այլընտրանք չունեն»:
«Մենք մեծապես կարեւորում ենք նաեւ ԵՄ-ի ներգրավվածությունը քաղհասարակության կայացման գործում»,- ասաց Արմեն Աշոտյանը: Այս համատեքստում նա նկատի ունի նաեւ Արցախի համապատասխան կառույցների հետ եվրոպական կառույցների համագործակցությունները:
Արցախի հետ համագործակցությունների մասին, ավելի ուշ, իր ելույթում խոսեց նաեւ «Ծառուկյան» դաշինքի պատգամավոր Նաիրա Զոհրաբյանը: Նա հիշեցրեց, որ Եվրոպական խորհրդարանը որոշում էր կայացրել չճանաչված պետությունների հետ կրթական, մշակութային ոլորտներում համագործակցությունների մասին ու հեգնեց`հաճախ մենք դժգոհում ենք, որ մեր խորհրդարանի կայացրած որոշումներն ու օրենքները չեն կիրառվում, սակայն, այստեղ էլ կարծես խնդիր կա: Հորդորեց եվրոպացի գործընկերներին, քանի դեռ 2017 թվականը չի բոլորել, փորձել ավելի գործնական լինել այս առումով:
Մանրամասները`տեսանյութում
Նելլի ԳՐԻԳՈՐՅԱՆ
