Ոստիկանության ՊՊԾ գունդը գրաված եւ մի շարք ծանր հանցագործությունների մեջ մեղադրվող «Սասնա ծռեր» խմբին օժանդակելու եւ 2016թ. հուլիսի 29-ին զանգվածային անկարգություններ կազմակերպելու մեջ մեղադրվող ընդդիմադիր քաղաքական գործիչ ԱնդրիասՂուկասյանի գործով հերթական դատական նիստում այսօր նրա շահերի պաշտպան, փաստաբան Կարեն Մեժլումյանը դատավոր Վարդան Գրիգորյանի դեմ ինքնաբացարկի միջնորդություն է ներկայացրել, որի պատճառը նախորդ նիստում դատավորի պահվածքն է եւ վերջինիս գործողությունները:
Aravot.am-ի հետ զրույցում Կարեն Մեժլումյանը նշեց. «Դատավորը ճնշումներ գործադրեց վկա-ոստիկանի վրա, որպեսզի նա դատարանում ցուցմունքը փոխի, եւ հասավ դրան: Նա ակնհայտ բարկացավ վկայի վրա եւ ինքն էլ ընդունեց, որ բարկանում է: Խոսքն այն վկայի մասին է, որի ցուցմունքի հիման վրա Դավիթ Հովհաննիսյանին 11 ամիս կալանքի տակ պահեցին: Նա ասաց՝ չի տեսել, որ Դավիթը քարով հարվածի, բայց դատավորի բարկանալուց հետո ասաց՝ «այո, տեսել եմ»:
Պաշտպանական կողմի պնդմամբ՝ 2016թ. հուլիսի 29-ին Սարի թաղում ոչ թե զանգվածային անկարգություններ են եղել, այլ ոստիկանները, ինչպես Կարեն Մեժլումյանն է նշում, զինված հարձակում են գործել քաղաքացիների վրա: «Ես դրա հետ կապված հարց տվեցի վկա-ոստիկանին, դատավորն էլ ասաց, թե իրեն դուր չի գալիս «հարձակում գործել» եզրույթը…Դե, եթե դատավորին դուր չի գալիս, ուրեմն նա շահագրգռվածություն ունի, նա արդեն իսկ կանխակալ է»,-համոզմունք հայտնեց փաստաբանը:
Հավելենք, որ միջնորդության առնչությամբ դատարանը խորհրդակցական սենյակում է եւ դեռ որոշում չի կայացրել:
Լուիզա ՍՈՒՔԻԱՍՅԱՆ
