ԱԺ-ում «Ընտանեկան օրենսգրքում փոփոխություններ եւ լրացումներ կատարելու մասին» նախագծի քննարկման ժամանակ «Ելքի» պատգամավոր Գեւորգ Գորգիսյանը իր մտահոգությունները հայտնեց՝ նախագծում որոշ ձեւակերպումների հետ կապված: Մասնավորապես, նրան մտահոգել էր այն, որ կառավարությունը 1-ին հոդվածում փոփոխություն է կատարել. «Նախկինում այս հոդվածում մայրության եւ մանկության կողքին կար հայրություն, հայրությունը հանվել է, արդյոք մեզ հայրությունը կարեւո՞ր չէ, որ հանվել է»: Նա նաեւ հարցրեց՝ նախագծում ամրագրվել է, որ ամուսնանալիս եւ ընտանեկան հարաբերություններում արգելվում է ռասսայական, մաշկի գույնի եւ այլ խտրականությունները. «Այսինքն, օրենքով մենք մարդուն արգելում ենք, թե ինչպես ընտրել ամուսին կամ կի՞ն, սա անհասկանալի ձեւակերպում է մեզ համար»:
Արդարադատության փոխնախարար Սուրեն Քրմոյանը 1-ին հոդվածում հայրությունը հանելու հետ կապված պատասխանեց, որ բառացի Սահմանադրությանն են համապատասխանեցրել՝ 16-րդ հոդվածին: Ինչ վերաբերում է ամուսնությանը, նա ասաց, որ դա բխում է Սահմանադրության 29-րդ հոդվածի պահանջներից. «Ոչ թե արգելում ենք ընտրել, արգելում ենք խտրականությունը: Չեն կարող ամուսնությունը գրանցելիս ասել՝ այս մարդը այլ ռասսայից է, այլ մաշկի գույն ունի»:
Գորգիսյանը ճշտեց. «Այսինքն, եթե ինչ-որ աղջիկ, որը սեւամորթ է, ես առաջարկում եմ ամուսնանալ, նա մերժում է, ես կարող եմ օրենքի այս հոդվածին հղում անելով՝ դատարան դիմել, որ նա ռասսայական հիմքով մերժե՞ց ինձ հետ ամուսնանալ»:
ԱԺ փոխխոսնակ Էդուարդ Շարմազանովը միջամտեց՝ Գորգիսյանին հիշեցնելով, որ նա «իր փայ» առաջարկությունն արդեն արել է եւ ընտանիք ունի:
Իսկ փոխնախարարը պատասխանեց, որ Սահմանադրությունում ամրագրված է, որ կինը եւ տղամարդը կարող են իրենց ազատ կամարտահայտութամբ ձեւավորել ընտանիք, իսկ այստեղ ամրագրվում է, որ որեւէ պետական մարմին չի կարող խտրականություն դնել: Այս նորմը գործում է ընտանիքից դուրս:
Շարմազանովն էլ հավելեց, որ սա շատ նորմալ դրույթ է. «Ո՛չ ռասսիզմին»:
Հռիփսիմե ՋԵԲԵՋՅԱՆ
