Կառավարությունը եւս մեկ արտահերթ նիստ է հրավիրել ԱԺ-ում:
Նիստը սկսեց դժգոհություններով, նախ, գրանցվեց 95 պատգամավոր, «Ելք» խմբակցության ղեկավար Նիկոլ Փաշինյանը հորդորեց ԱԺ նախագահին ուշադիր լինել, այդքան մարդ չի եկել նիստին. «Մենք վերակացուի դեր չպետք է ստանձնենք»:
«Ելքն» առաջարկեց, որ որոշ օրենքներ քննարկվեն ավելի երկար ժամանակահատվածում: Արտակ Զեյնալյանը Բաբլոյանին ասաց. «Դուք պատասխանատու եք ԱԺ-ի բնականոն գործունեության համար,ԱԺ-ն բնականոն չի գործում»:
Էդմոն Մարուքյանն էլ դժգոհեց՝ ԱԺ-ն հո կառավարության գերին չի, սենց չի լինի, պարոն Բաբլոյան ջան, սահմանադրական օրենքներ են քննարկվում, ոչ ոք չի հասցրել կարդալ: Նա բողոքեց, որ երեկ մինչեւ ժամը 7-ը պետաիրավական հանձնաժողովի նիստին են եղել:
«Ծառուկյան» խմբակցության պատգամավոր Նաիրա Զոհրաբյանը միացավ բողոքին. «Ես հասկանում եմ, որ 21-րդ դարը արհեստական ինտելեկտի դար է, բայց այն դեռ ՀՀ չի հասել:Միգուցե շատ են ուղղակի կոճակ սեղմողները Ես հասկանում եմ, որ ոմանք սրբազան սարսուռով են վերաբերվում կառավարության նախագծերին, բայց «Ծառուկյան» դաշինքը այդ սրբազան սարսուռով չի նայում»: Նա ասաց, որ կառավարության նախագծերն իրենք չեն դակելու:
Նիստը վարող ԱԺ փոխխոսնակ Էդուարդ Շարմազանովն ասաց, որ յուրաքանչյուր խմբակցություն իր քվեարկությամբ արդեն հաստատել է կողմ է, թե դեմ. «Ոնց որ ընդամենը 4 հոգի է դեմ եղել»:
Հռիփսիմե ՋԵԲԵՋՅԱՆ
