Կայացել է սիրիահայերի հիմնախնդիրները համակարգող միջգերատեսչական հանձնաժողովի հերթական նիստը

Դեկտեմբերի 18-ին ՀՀ սփյուռքի նախարարությունում տեղի ունեցավ Սիրիահայերի հիմնախնդիրները համակարգող միջգերատեսչական հանձնաժողովի հերթական նիստը, որին մասնակցեցին գերատեսչությունների, սիրիահայերի խնդիրներով զբաղվող հասարակական և միջազգային կազմակերպությունների ներկայացուցիչներ:

Սիրիահայերի իրավական աջակցության ծրագրերի մասին զեկուցումով հանդես եկավ Ամերիկյան իրավաբանների ընկերակցության (ABA/ROLI) հայաստանյան  ներկայացուցչության փոխտնօրեն Հասմիկ Հակոբյանը: Նա նշեց, որ կազմակերպությունը սկսել է գործել 2016թ. սեպտեմբերից՝ ԱՄՆ Պետդեպարտամենտի փախստականների  եւ միգրացիայի հարցերի վարչության ֆինանսավորմամբ: Իրավաբանական աջակցություն է ցուցաբերվել 171 շահառուի՝ 181 գործով, որոնց 70 տոկոսը դրական լուծում է ստացել: Զեկուցողը նշեց, որ աջակցությունը ցուցաբերվում է Իրավաբանական կլինիկայի միջոցով, որտեղ աշխատում են հմուտ փաստաբաններ, իրավաբանական ֆակուլտետների ուսանողներ, ներգրավված են նաև սիրիահայ մասնագետներ: Հասմիկ Հակոբյանը շնորհակալություն հայտնեց Սփյուռքի նախարարությանը և հատկապես իրավաբանական վարչությանը՝ աջակցության և համագործակցության համար:

Նախարարը նշեց, որ այդ համագործակցության արդյունքը «Հաճախ տրվող իրավական հարցերի տեղեկատվական ձեռնարկն» է:

Սիրիահայերին ցուցաբերած աջակցության և նախատեսվող ծրագրերի մասին զեկուցում ներկայացրեց  «Միգրացիա և զարգացում» և սիրիահայերի աջակցության ծրագրերի ղեկավար Լուսինե Ստեփանյանը: Զեկուցողը նշեց, որ կազմակերպությունը հիմնականում հումանիտար օգնություն է տրամադրում: «Առ այսօր Կաթողիկե եկեղեցու առաջնորդարանում սիրիահայ ընտանիքներ են բնակվում: Զբաղվում են Եվրոպայից վերաինտեգրվող ընտանիքների խնդիրներով: 2016-2017թթ. դիմել է 5 ընտանիք՝ Շվեդիայից և Ավստրիայից: Կազմակերպությունը ԵՄ ֆինանսավորմամբ իրականացնում է «Ճանաչել, պաշտպանել, իրագործել»  ծրագիրը, որը հիմնականում ուղղված է տնտեսական ինտեգրման ծրագրի շրջանակներում բիզնեսի աջակցությանը: Լիբանանում բնակվող սիրիահայերին ՀՀ քաղաքացիության անձնագրեր տալու հարցի հետ կապված պարզաբանումներ տվեցին  ՀՀ արտաքին գործերի նախարարի տեղակալ Արմեն Պապիկյանը և ՀՀ ԿԱ ոստիկանության անձնագրային և վիզաների վարչության պետ Մնացական Բիչախչյանը:

ՀՀ սփյուռքի նախարարության աշխատակազմի ղեկավար Ֆիրդուս Զաքարյանը ներկայացրեց «Սիրիահայերի հիմնախնդիրները համակարգող միջգերատեսչական հանձնաժողովի 2018 թվականի» աշխատանքային ծրագիրը:

Քննարկվեցին «Սիրիական հակամարտության հետևանքով հարկադիր տեղահանված և Հայաստանում պաշտպանություն հայցող անձանց ինտեգրման 2018-2022 թվականների ռազմավարության» նախագծի հետ կապված և այլ ընթացիկ հարցեր:

ՀՀ ԿԱ քաղաքացիական ավիացիայի գլխավոր վարչության պետի տեղակալ Արսեն Պողոսյանը ներկայացրեց դեկտեմբերի 6-9-ը Սիրիա կատարած աշխատանքային այցի տպավորությունները, նշեց, որ Դամասկոսի օդանավակայանը պատրաստ է չվերթներին: «Սիրիայում ոգևորված են Դամասկոս-Երևան նոր չվերթով», – հավելեց նա:

Ամփոփելով նիստը՝ ՀՀ սփյուռքի նախարար Հրանուշ Հակոբյանը մասնավորապես նշեց. «Շատ սիրիահայեր իսկապես ինտեգրվել են և չեն ուզում վերադառնալ: Բոլորիդ աշխատանքի արդյունքն է, շնորհակալություն: Գլխավորը ջերմ մթնոլորտն է, որի մեջ հայտնվեցին մեր հայրենակիցները»:

Նախարարը հրավիրեց բոլորին՝ մասնակցելու դեկտեմբերի 22-23 քաղաքապետարանի ճեմասրահում կազմակերպվող «Սիրիահայերի շունչը Հայաստանում» ձեռքի աշխատանքների ցուցահանդես-տոնավաճառին ու հավելեց. «Թող գալիք 2018 թվականին իրականան ձեր բոլոր ցանկությունները: Լավ օրեր և լավ տրամադրություն»:

ՀՀ սփյուռքի նախարարություն