«Համաձայնագիրը ստորագրվեց ՀՀ-ի եւ ԵՄ-ի համար շատ կարեւոր ժամանակահատվածում: ՀՀ-ն հասել է այն իրավիճակին, որի սահմաններից այն կողմ կամ անելու ենք լրջագույն բարեփոխումներ, կամ կանգնելու ենք լրջագույն խնդիրների առաջ»,-«Կոնրադ Ադենաուեր» հիմնադրամի՝ այսօր Երեւանում կազմակերպած քննարկման ժամանակ անդրադառնալով նոյեմբերին ՀՀ-ի եւ ԵՄ-ի միջեւ ստորագրված Ընդլայնված եւ համապարփակ գործընկերության համաձայնագրին, ասաց ՀՀ ԱԺ պատգամավոր, եվրոպական ինտեգրման հարցերի մշտական հանձնաժողովի նախագահ Նարիա Զոհրաբյանը:
Նրա բնորոշմամբ՝ գաղտնիք չէ, որ ԵՄ-ն եւս այսօր լուրջ բարեփոխումների կարիք ունի եւ մարտահրավերների առաջ է կանգնած. «Խոսքը տնտեսական եւ միգրացիոն մարտահրավերների մասին է: Ինքս չեմ կիսում տեսակետը, թե միգրացիոն ճգնաժամը քանդելու է ԵՄ-ն»:
Ինչ վերաբերում է Հայաստանին, Նաիրա Զոհրաբյանի խոսքով. «Հնարավոր չէ սովետական «Մոսկվիչի» շարժիչով՝ բեռնաթափում ունենալով կոռուպցիա եւ տնտեսական մենաշնորհներ, շարժվել առաջ: Սա վատ ճանապարհ է: Իհարկե իշխանության ներկայացուցիչներին դուր չի գալիս «քաղաքական կամք» ձեւակերպումը, նրանք դա «ռետրո» կամ «ժամանակավրեպ» են որակում, բայց ես զուսպ լավատեսությամբ եմ վերաբերվում ՀՀ-ԵՄ համաձայնագրին»:
Նաիրա Զոհրաբյանի բնորոշմամբ՝ ՀՀ իշխանությունների «իմիտացիաների» ժամանակը սպառված է. «Կամ իսկապես գնալու ենք խորքային փոփոխությունների ճանապարհով, կամ երկիրը կդատապարտվի փակուղու՝ գրեթե բոլոր ոլորտներում»:
Լուիզա ՍՈՒՔԻԱՍՅԱՆ
