«Շատ լավատես եմ մեր ապագա հարաբերությունների առնչությամբ: Արեւելյան գործընկերության անդամները հնարավորինս պետք է մոտենան ԵՄ չափանիշներին, հետեւաբար՝ ստանան ԵՄ օժանդակությունը»,-«Կոնրադ Ադենաուեր» հիմնադրամի՝ այսօր Երեւանում կազմակերպած քննարկման ժամանակ անդրադառնալով նոյեմբերին ՀՀ-ի եւ ԵՄ-ի միջեւ ստորագրված Ընդլայնված եւ համապարփակ գործընկերության համաձայնագրին, ասաց Գերմանիայի Բունդեսթագի պատգամավոր Ալբերտ Վայլերը:
Նրա խոսքով՝ Գերմանիան եւ Եվրամիությունը պատրաստ են օժանդակել Հայաստանում իրավական պետության եւ քաղաքացիական հասարակության կայացմանը. «Համոզված ենք, որ կարող ենք ունենալ կայուն եւ երկարատեւ բարեկամական հարաբերություններ: Հայաստանը եւս կարիք ունի ԵՄ-ի հետ աշխատանքի հստակ օրակարգի: Այս իմաստով համաձայնագրի ստորագրումը մեծ հաջողություն է, որով ՀՀ-ն հրաշալի հնարավորություն ունի ընդլայնելու գործընկերությունը ԵՄ-ի հետ եւ իրականացնելու բարեփոխումներ տարբեր ոլորտներում»,-նշեց նա:
Բունդեսթագի պատգամավորի խոսքով՝ ԵՄ-ի նպատակն է ակտիվացնել ՀՀ-ի հետ քաղաքական եւ տնտեսական հարաբերությունները, ինչն էլ ենթադրում է, որ ՀՀ-ի մասնակցությունը ԵՄ քաղաքականության համատեքստում ակտիվանա:
«Համաձայնագիրը նպաստում է նաեւ խաղաղությանը եւ կայունությանը միջազգային մակարդակում: Դրանով Հայաստանի հետ կարող ենք բարելավել սահմանների ապահովությունը եւ նպաստել անդրսահմանային հարաբերությունների զարգացմանը: Մենք ցանկանում ենք նպաստել անվտանգությանը եւ իրավական պետության զարգացմանը»,-վստահեցրեց Ալբերտ Վայլերը:
Նա հայտարարեց՝ նախապես քննարկումներ են տեղի ունեցել, եւ, ըստ այդմ, ԵՄ-ն մտադիր է ՀՀ-ի հետ երկխոսությունն ակտիվացնել՝ անվտանգության եւ պաշտպանության ոլորտներում. «Համաձայնագրի կողմերը պատրաստ են պաշտպանել միջազգային իրավունքի սկզբունքները, որոնք սահմանել է ՄԱԿ-ը: Մեզ համար Կովկասում կայունությունը կարեւոր է»:
Լուիզա ՍՈՒՔԻԱՍՅԱՆ
