Հաջորդ տարում սպասվելիք ՆԱՏՕ-ի գագաթաժողովում շեշտը դրվելու է երկու առաջնահերթությունների վրա: Առաջինը կառույցի կողմից անդամ-երկրներին պաշտպանական ոլորտում աջակցություն ցուցաբերելն է: Երկրորդ խնդիրն էլ կայունության ամրապնդումն է: Այս մասին այսօր ԵՊՀ-ում ուսանողների հետ հանդիպմանն ասաց ՆԱՏՕ-ի գլխավոր քարտուղարի տեղակալ Ռոուզ Գոթեմյոլլերը: «Կայունությունը ենթադրում է, որ մենք աշխատում ենք դաշնակիցների և գործընկերների հետ՝ նպատակ ունենալով պայքարել վերջին մարտահրավերների, նաեւ՝ ահաբեկչության դեմ»,-հայտարարեց նա:
Ինչ վերաբերում է ՀՀ-ՆԱՏՕ գործակցությանը, Գոթեմյոլլերը հետեւյալ գնահատականը տվեց. «Այնքան բան ենք արել համատեղ…Գնահատում ենք այդ գործակցությունը: ՀՀ-ն առաջին երկիրն է, որը խաղաղապահներ է ուղարկել Կոսովո և Աֆղանստան: Շնորհակալ եմ Հայաստանի ժողովրդին եւ երկրի կառավարությանը»:
Բարձրաստիճան պաշտոնյան նաեւ համոզմունք հայտնեց, որ ՆԱՏՕ-ն պաշտպանական կառույց է, որը միաժամանակ ռազմաքաղաքական նշանակություն ունի. «Մենք պաշտպանում ենք միջազգային իրավունքները, սատարում ազգերի ինքնորոշմանը եւ տարածքային ամբողջականությանը: Մենք պաշտպանական գործառույթ ենք իրականացրել նաեւ այն ժամանակ, երբ Ռուսաստանը Ուկրաինայում ՆԱՏՕ-ի դաշնակիցներին ուղղված գործողություններ էր իրականացնում»:
Լուիզա ՍՈՒՔԻԱՍՅԱՆ
