«Ակնհայտ է՝ գործ ունենք խոշոր ծրագրի հետ, որի գործարկումը չափազանց կարեւոր քայլ է ոչ միայն հայ-իրանական, այլեւ ՀՀ-ԵՏՄ եւ ՀՀ-ԵՄ հարաբերություններում»,-«Հենարան» մամուլի ակումբում այսօր անդրադառնալով օրերս Մեղրու ազատ տնտեսական գոտու գործարկմանը, ասաց իրանագետ Վարդան Ոսկանյանը: Նրա բնորոշմամբ՝ այդ ծրագրով ՀՀ-ն կարող է ծառայել որպես հարթակ՝ ոչ միայն ՀՀ-Իրան երկկողմ հարաբերությունները զարգացնելու, այլեւ Հայաստանի կողմից Իրանի համար դեպի այլ շուկաներ ելք ապահովելու տեսանկյունից»:
«Աշխարհաքաղաքական առումով Մեղրու ազատ տնտեսական գոտին չափազանց կարեւոր խնդիր է լուծել, քանի որ ստեղծվել է բարեկամական երկրի՝ Իրանի հետ սահմանին: Այն մասնավորապես նշանակալի է իրանական ներդրումներ հրապուրելու տեսանկյունից: Օրինակ, խմելու ջուրը, որը կարտադրվի Մեղրու տնտեսական գոտում՝ իրանական կապիտալով, ավելի մրցունակ կլինի մյուս շուկաներում, քան հենց Իրանի ներսում արտադրված նույն ապրանքը»,-նկատեց Վարդան Ոսկանյանը:
Փորձագետի գնահատմամբ՝ անցնող տարում հայ-իրանական հարաբերություններում ձեռքբերումներն ակնհայտ են. «Տրանսպորտային ոլորտում ծրագրերի իրականացում է անհրաժեշտ: Պետք է օրակարգում պահել ՀՀ-Իրան երկաթուղու ծրագիրը: Բացի այդ, Իրանի եւ ԵՏՄ-ի միջեւ ազատ առեւտրի համաձայնագիրը, ինչպես հայտարարվեց, վերջնական տեսքի է բերված, հետեւաբար, այն կստորագրվի»:
Մանրամասն քիչ ուշ՝ տեսանյութում:
Լուիզա ՍՈՒՔԻԱՍՅԱՆ
