Ռուսաստանի հատուկ ծառայությունները Սանկտ Պետերբուրգում «Իսլամական պետության» կողմից ծրագրվող ահաբեկչությունը կանխել են ԱՄՆ Կենտրոնական հետախուզական վարչության (ԿՀՎ) օգնությամբ, սակայն վերջինս հրաժարվում է այդ կապակցությամբ որևէ մեկնաբանություն տալ:
Ի պատասխան հարցի՝ մանրամասներ հայտնել Ռուսաստանին տեղեկատվության փոխանցման մասին և գնահատել երկու երկրների համագործակցության մակարդակը ահաբեկչության դեմ պայքարում՝ ԿՀՎ ներկայացուցիչ Նիկոլ դե Հեյը խնդրել է այդ հարցով դիմել Սպիտակ տանը:
Իր հերթին Ռուսաստանի նախագահ Վլադիմիր Պուտինը հեռախոսազրույց է ունեցել ԱՄՆ իր գործընկեր Դոնալդ Թրամփի հետ և շնորհակալություն հայտնել նրան համագործակցության համար:
«Ռուսաստանի նախագահը շնորհակալություն է հայտնել իր ամերիկացի գործընկերոջը՝ ԿՀՎ-ի կողմից տրամադրված տեղեկատվության համար, որն օգնել է դուրս գալ Սանկտ Պետերբուրգի Կազանի Աստվածամոր տաճարում, ինչպես նաև քաղաքի այլ վայրերում ահաբեկչություն ծրագրած ահաբեկիչների խմբի հետքի վրա, հայտնաբերել նրանց և ձերբակալել»,- ասվում է Կրեմլի տարածած մամուլի հաղորդագրության մեջ:
Ավելի վաղ հաղորդվում էր, որ Ռուսաստանի հատուկ ծառայությունները ձերբակալել են «Իսլամական պետության» 7 անդամների, որոնք ահաբեկչություններ էին նախապատրաստվում քաղաքի տարբեր վայրերում:
Պատրաստեց՝ Վիկտորյա ԱՆԴՐԵԱՍՅԱՆԸ
