Դեկտեմբերի 17-ին Նկարիչների միությունում բացվեց Հայաստանի երիտասարդ կանանց ասոցիացիայի (ՀԵԿԱ) կազմակերպած արդեն ավանդական դարձած բարեգործական տոնավաճառը` նվիրված Ամանորին և Սուրբ Ծնունդին:
Տոնավաճառի մասնակիցների շարքում էին տարբեր երկրների մշակույթ ներկայացնող դեսպանատներ, տեղական և միջազգային ՀԿ-ներ, անհատ արտադրողներ և կազմակերպություններ, տեղացի և սիրիահայ արտադրողներ:
Հատկապես ուշադրություն էին գրավում Չինաստանի Հանրապետության դրոշները, որոնց ներքո այդ երկրի ներկայացուցիչները իրենց արտադրանքը ներկայացնելուց զատ նաեւ հասմիկի թեյ էին առաջարկում այցելուներին:
Լուսինե Հարությունյանը ներկայացրել էր հեղինակային ձեռագործ զարդեր: Նա Aravot.am-ի հետ զրույցում նշեց, որ պարբերաբար մասնակցում է բոլոր տոների առիթներով կազմակերպված ցուցահանդեսներին:
«Մասնագիտությամբ նկարիչ դիզայներ եմ, սովորել եմ Թերլեմեզյանի անվան գեղարվեստի քոլեջում, այնուհետեւ թատերականի բեմանկարչական բաժնում: Զարդերի պատրաստումով զբաղվում եմ արդեն 12 տարի: Ոչ միայն սիրում եմ պատրաստել զարդեր, այլեւ ինքս կրել իմ պատրաստած զարդերը»,-ասաց զարդագործը: Լուսինե Հարությունյանից հետաքրքրվեցինք, թե ովքեր են իր հաճախորդները: Մեր զրուցակցի ձեւակերպմամբ, նրանք գեղեցիկը գնահատող մարդիկ են:
Մոնիկա Խաչատրյանը կաշվից զարդեր է պատրաստում, ասում է հաճույքով է կատարում այդ աշխատանքը: «Հաճախորդներս տարբեր ոլորտներ ներկայացնող տարբեր մասնագիտությունների տեր մարդիկ են, հիմնականում արվեստագետներ, շատերն էլ արտասահմանից են: Ով կաշին գնահատում է, իմ հաճախորդն է դառնում»,-ասաց Մոնիկա Խաչատրյանը:
Նա նախկինում աշխատել է որպես մանկապարտեզի դաստիարակչուհի, զարդագործությունն ավելի հոգեհարազատ է համարում:
Բացի զարդերից, ներկայացված էր հագուստ, զանազան աքսեսուարներ, քաղցրավենիք, սիրիահայերն արեւելյան ուտեստներ էին ներկայացնում ու արծաթե զարդեր:
Գոհար ՀԱԿՈԲՅԱՆ
