Եվրամիության անդամ երկրների ղեկավարները երկարաձգել են Ռուսաստանի նկատմամբ կիրառվող տնտեսական ծանր պատժամիջոցների ժամկետը մինչև 2018 թվականի հուլիս ամիսը: Այս մասին որոշումը կայացվել է Եվրամիության գագաթաժողովի ընթացքում:
Պատժամիջոցները կապված են արևելյան Ուկրաինայի հակամարտության մեջ Ռուսաստանի ունեցած դերակատարության և Ղրիմի բռնակցման հետ: Դրանք ընդգրկում են Ռուսաստանի ֆինանսական, էներգետիկ և ռազմական ոլորտները:
Եվրամիության նախագահ Դոնալդ Թուսքը, ով գլխավորում էր Եվրամիության գագաթաժողովը, ընդգծել է, որ դաշինքի բոլոր 28 անդամները համաձայն էին պատժամիջոցների ժամկետների երկարաձգման որոշման հետ:
Մոսկվան ափսոսանք է հայտնել Եվրամիության որոշման կապակցությամբ: Դրա մասին տեղեկացրել է Կրեմլի խոսնակ Դմիտրի Պեսկովը:
Մանրամասներին կարող եք ծանոթանալ՝ «Ամերիկայի ձայն»-ի կայքում:
