ԱԺ պատգամավոր, հայ օլիգարխիայի մնայուն ներկայացուցիչ Սամվել Ալեքսանյանը գովազդել է դստեր՝ հայկական արտադրության տրիկոտաժի թագուհու կարգավիճակին հավակնող Աստղիկ Ալեքսանյանի բիզնեսը: «Երկիրը շատ լավ ղեկավարվում է: Չե՞ք ուզում գաք նայեք աշխատատեղերը: Իմ աղջկա բիզնեսն է, իմը չէ: Որ ուզենաք, դուք էլ կդնեք բիզնես: Ես տանը բիզնես դասեր եմ տալիս, եկեք դուք էլ մասնակցեք դասերին, դուք էլ բիզնես դրեք, մարդիկ բիզնես չեն կարողանում դնել, որովհետեւ իմ դասերին չեն մասնակցում»,- իր ծառայություններն է առաջարկել օլիգարխը:
Ինչ վերաբերում է Աստղիկ Ալեքսանյանին, ապա նա, որպես բարձրաստիճան պաշտոնյայի հետ փոխկապակցված, համատեղ ապրող զավակ, Բարձրաստիճան պաշտոնատար անձանց էթիկայի հանձնաժողով է ներկայացրել իր գույքի եւ եկամուտների տարեկան հայտարարագիրը, որն օգտակար տեղեկություններ է հաղորդում նրա ֆինանսական կացության մասին (դուստր Ալեքսանյանն այս տարի ամուսնացել է):
Մասնավորապես՝ 2016 թ. հայտարարագրում Աստղիկ Ալեքսանյանը ոչ մի անշարժ եւ շարժական գույք չի հայտարարագրել, փոխարենը շահաբաժիններն ու աշխատավարձը կամ դրան հավասարեցված այլ վճարումներն է ներկայացրել: Դուստր Ալեքսանյանը երեք տարբեր՝ 141,124.00, 45,690.00 եւ 145,085.00 ՀՀ դրամ շահաբաժին է հայտարարագրել, ինչպես նաեւ երկու տարբեր տեղերից ստացված 1 մլն․ 200 հազարական դրամ աշխատավարձ:
Իսկ, ահա, նրա մայրը՝ Ս. Ալեքսանյանի կին Շողերինա Մկրտչյանը, որը հավանաբար, եւս մասնակցում է ամուսնու բիզնես դասերին, 2016 թ․ հայտարարագրում ահռելի ունեցվածք է ներկայացրել: Մասնավորապես, նա հաշվետու տարում ձեռք է բերել մեկ հողամաս՝ 6 մլն․ 701 հազար 436 դրամով, ինչպես նաեւ արտադրական նշանակության շինություն (արդյունաբերական եւ գյուղատնտեսական արտադրությունների տեղակայման եւ նրանց մեջ տեխնոլոգիական սարքավորումների շահագործման համար անհրաժեշտ պայմաններն ապահովող շինություն):
Հեղինե ՄԱՆՈՒԿՅԱՆ
Հոդվածն ամբողջությամբ՝ «Հրապարակ» օրաթերթի այսօրվա համարում
