2016թ. Ոստիկանության ՊՊԾ գունդը գրաված եւ մի շարք ծանր հանցագործությունների մեջ մեղադրվող «Սասնա ծռեր» խմբի անդամների գործով այսօրվա դատական նիստում ամբաստանյալների պաշտպանները եւ մեղադրող-դատախազները տեւական ժամանակ քննարկեցին մեղադրական եզրակացությունների՝ անհատականացված լինել-չլինելու հարցը:
Ամբաստանյալների պաշտպանները քանիցս մատնանշեցին, որ մեղադրողները «կոլեկտիվ մեղադրանքներ» են կազմել, ինչի պատճառով իրենք չգիտեն՝ ինչպե՞ս իրականացնեն պաշտպանական մարտավարությունը:
Ամբաստանյալներից մի քանիսն էլ դժգոհեցին՝ ասելով, որ չգիտեն՝ ինչո՞ւմ են մեղադրվում:
Դատախազներից Հակոբ Ենոքյանը պարզաբանեց, որ մեղադրական եզրակացությունները հստակ շարադրված են, այլ է հարցը, որ որոշ ամբաստանյալների համար դրանք հասկանալի չեն:
Մյուս դատախազ Արթուր Չախոյանն էլ վստահեցրեց՝ մեղադրանքի կողմը պատրաստ է ապացույցները մատնանշել, բայց օրենքը նման ընթացակարգ չի նախատեսում, ուստի ապացույցների հետազոտման փուլից հետո պաշտպանական կողմի բոլոր հարցադրումներին կարձագանքեն: Ամբաստանյալները սկսեցին ընդհատել դատախազներին եւ իրենց կարծիքը պնդել, դատավոր Արտուշ Գաբրիելյանն էլ նրանց սաստեց՝ ասելով, որ առանց իր թույլտվության չի կարելի տեղից խոսել: Ամբաստանյալները, սակայն, շարունակեցին, ինչը բարկացրեց դատավորին: «Ուրեմն լսի՜ քեզ ինչ եմ ասում…Էս ներքեւում իրար հետ պայմանավորվե՞լ եք, որ պետք է խոսեք-խանգարեք: Առավոտ լավ էիք»,-բղավեց նա, ապա նիստերի դահլիճից հեռացրեց ամբաստանյալներից Արթուր Սողոմոնյանին:
Դատախազների հասցեին վիրավորական արտահայտություններ հնչեցնելու համար նիստերի դահլիճից հեռացվեց նաեւ ամբաստանյալներից Խաչատուր Գիչյանը:
Դատավորը զգուշացրեց՝ եթե մինչ օրս չի ընդհատել ամբաստանյալների խոսքը եւ թույլատրել է արտահայտվել, դա չի նշանակում, որ կարելի է չափն անցնել: «Սրանից հետո առանց իմ թույլտվության մեկը չխոսի»,-հրահանգեց նա:
Հաջորդ նիստում դատարանը նախատեսում է անցնել ապացույցների հետազոտման փուլին:
Լուիզա ՍՈՒՔԻԱՍՅԱՆ
