Երեկ կեսօրին գլխի, դեմքի փափուկ հյուսվածքների սալջարդով շտապօգնության մեքենայով Գյումրի բժշկական կենտրոն են տեղափոխել նորակառույց «Մուշ» թաղամասի բնակչուհի 24-ամյա Քրիստինա Գոբեչկինային, որը բժիշկներին հայտնել է, թե իրեն տանը ծեծի է ենթարկել ամուսինը՝ 25-ամյա Պավել Պետուխովը։ Վերջինս Գյումրիում տեղակայված 102-րդ ռազմաբազայի զինծառայող է։
Գյումրի բժշկական կենտրոնի փոխտնօրեն Արմեն Խաչատրյանը մեզ տեղեկացրեց, որ նրան բուժզննման են ենթարկել նյարդավիրաբույժ Անդրանիկ Հովհաննիսյանն ու վիրաբույժ Սահակյան Արթուրը, գանգի ռենտգենգրաֆիա են արել, սրսկել ու ճանապարհել են տուն։
Շիրակի մարզի դատախազ Կարեն Գաբրիելյանն էլ ասաց, որ նյութեր են նախապատրաստվում ծեծի ենթարկելու հատկանիշներով։
Հիշեցնենք, որ ՀՀ Քրեական օրենսգրքի 118 հոդվածը, որ կոչվում է «Ծեծը», սահմանում է. «Ծեծելը կամ այլ բռնի գործողություններ կատարելը, որը չի առաջացրել սույն օրենսգրքի 117-րդ հոդվածով նախատեսված հետեւանքներ՝ պատժվում է տուգանքով՝ նվազագույն աշխատավարձի առավելագույնը հարյուրապատիկի չափով, կամ ուղղիչ աշխատանքներով՝ առավելագույնը մեկ տարի ժամկետով, կամ կալանքով՝ առավելագույնը երկու ամիս ժամկետով»:
Նունե ԱՐԵՎՇԱՏՅԱՆ
