Այսօր կառավարության նիստից հետո առողջապահության նախարար Լեւոն Ալթունյանը լրագրողների հետ ճեպազրույցում անդրադարձավ դեղերի եւ առողջապահական ծառայությունների հնարավոր թանկացմանը:
Նշենք, որ տնտեսագետները հունվարի 1-ից թանկացումներ են կանխատեսում, որը նաեւ պայմանավորված է Հարկային նոր օրենսգրքի ուժի մեջ մտնելով:
Նախարար Ալթունյանն անդրադառնալով իր ղեկավարած ոլորտին, վստահեցրեց՝ առողջապահական համակարգում թանկացումներ չկան, ոլորտում գների իջեցման նախանշաններ կան. «Համենայնդեպս մենք այդ ուղղությամբ աշխատում ենք»:
Ինչ վերաբերում է դեղերի հավանական թանկացմանը, նախարարն ասաց, որ նախարարությունը մշակել է կենտրոնացված գնումների նախագիծ, որի շնորհիվ պետական պատվերով ձեռք բերվող դեղերի գները կէժանանան 20-23% -ով. «Դա նշանակում է, որ այդ քանակով ավելի դեղ ձեռք կբերվի կամ ավելի շատ հիվանդներ կսպասարկվեն»:
Նախարարը վստահեցրեց՝ կանխատեսվում է, որ դեղերի գները հունվարի 1-ից կնվազեն, խոսքը պետպատվերով ձեռքբերվող դեղերի մասին է. «Մենք ունենք մատակարարման տենդերներ, որտեղ հունվարի 1-ը չի ազդում»:
Մանրամասն՝ տեսանյութում
Նելլի ԲԱԲԱՅԱՆ
