«Բոլորի ուշադրությունը ուզում եմ հրավիրել մի նրբության վրա, ցավոք, Հայաստանի ԱԺ-ի հեղինակությունն այդքան էլ բարձր չէ, բայց լուրերի թողարկումով ցույց են տալիս քվեարկված ցուցատախտակը, որտեղ գրված է 86 կողմ, մինչդեռ դուք հայտարարում եք կողմ 95: Ես ներկա եմ եղել մի միջավայրի, որտեղ ասում են` օրը ցերեկով 7-8 ձայն խաբում են: Այնպես որ, ծրարներով քվեարկության պրակտիկան կամ… ընդհանրապես, մենք կարծում ենք, որ հակասահմանադրական է: Ուղղակի ցույց տվեցի, թե ինչ արձագանքներ կարող են լինել»,- խորհրդարանում, նման հայտարարություն արեց «Ելք» խմբակցության ղեկավար Նիկոլ Փաշինյանը:
Մինչ այդ եւ դրանից հետո, խորհրդարանը երկրորդ ընթերցմամբ եւ ամբողջական դրական քվեարկեց «Հայաստանի Հանրապետության բյուջետային համակարգի մասին» ՀՀ օրենքում փոփոխություններ եւ լրացումներին, «Պետական պարտքի մասին» ՀՀ օրենքում փոփոխություններ կատարելու մասին նախագծերին: Ֆինանսների նախարարի առաջին տեղակալ Ատոմ Ջանջուղազյանը նշեց, որ վերջին նախագծով «նոր էտապ է սկսվում բյուջետային կատարողականի վերաբերյալ, մասնավորապես, ծախսային ծրագրերի արդյունավետության գնահատման տեսակետից»:
Երկրորդ ընթերցմամբ եւ ամբողջությամբ ընդունվեցին նաեւ «ՀՀ բյուջետային համակարգի մասին» եւ «Պետական պարտքի մասին» ՀՀ օրենքում փոփոխություններ կատարելու մասին օրենքների նախագծերի փաթեթները, «Շահութահարկի մասին» ՀՀ օրենքում լրացումներ և փոփոխություններ կատարելու մասին նախագիծը: Երկրորդ ընթերցմամբ և ամբողջությամբ ընդունվեց ՀՀ ԱԺ-ի կողմից՝ 67 կողմ, 23 դեմ քվեարկությամբ:
Արձագանքելով Նիկոլ Փաշինյանի դիտողությանը՝ ԱԺ նախագահ Արա Բաբլոյանն ասաց` ինքն այսուհետ անպայման կհնչեցնի թե քանի պատգամավոր է գտնվում գործուղման մեջ եւ ի՞նչ վերաբերմունք ունեն նրանք քվեարկվող նախագծերի վերաբերյալ, որպեսզի հանրության համար թվերը հասկանալի լինեն. «Նաեւ կխնդրեմ լուրերում պատշաճ լուսաբանեն, որ հասարակությունն իմանա, որ գործուղման մեջ գտնվող պատգամավորի իրավունքը պաշտպանված է»:
Նելլի ԳՐԻԳՈՐՅԱՆ
