«Ինչո՞ւ չենք կարողանում կարեւորագույն նշանակության այդ ճանապարհի այդ հատվածը վերանորոգել եւ ինչ պետք է անենք, որ նման դեպքերում կախվածություն չունենանք ՌԴ կոնկրետ զորամասի քմահաճույքներից»,- այս հարցը խորհրդարանում այսօր հնչեցրեց «Ելք» խմբակցության պատգամավոր Գեւորգ Գորգիսյանը: Այն վերաբերվում է Սյունիքի մարզի Մ-2 Երեւան-Գորիս-Մեղրի-Իրանի սահման միջպետական ավտոմայրուղու 379+200 կմ երկարությամբ հատվածում Արաքս գետի ափի շուրջ 40 մ երկարությամբ վթարված հատվածին, որին «Առավոտն» այսօր անդրադարձել է:
Կառավարությունն այսօր որոշեց դադարեցնել վերանորոգման պայմանագիրը, քանի որ ՌԴ-ի 2393 զորամասի ղեկավարությունը համաձայնություն չի տվել. «Արաքս գետով սահմանակից է Իրանի Իսլամական Հանրապետությանը, եւ մեր ափամերձ տարածքները հսկվում են ՌԴ-ի 2393 սահմանապահ զորամասի կողմից»:
Ավելի ուշ, կառավարության նիստից հետո, Ջրային տնտեսության պետական կոմիտեի ղեկավար Արսեն Հարությունյանը փորձել է լրագրողներին համոզել, որ ՌԴ սահմանապահների հետ համաձայնության չգալու վերաբերյալ որոշման նախագծում վրիպակ է եղել: Նա պնդել է, որ ՌԴ սահմանապահների հետ որեւէ բանակցություն չի եղել եւ խնդիրը նրանց հետ չէ:
Նելլի ԳՐԻԳՈՐՅԱՆ
