Բլոգեր Ալեքսանդր Լապշինը, որն Ադրբեջանում ազատազրկման էր դատապարտվել և հետո ազատ արձակվել, պատրաստվում է այդ երկրի դեմ հայց ներկայացնել Մարդու իրավունքների միջազգային դատարան: Այս մասին Լապշինն ասել է «Սպուտնիկ Արմենիայի» հետ զրույցում:
«Մենք այժմ նախապատրաստվում ենք ՄԻԵԴ ներկայացվելիք հայցին, մոտավորապես այն կներկայացվի հունվարի վերջին»,- ասել է բլոգերը:
Լապշինը պատրաստվում է Բաքվից պահանջել ֆինանսական փոխհատուցում, չնայած առայժմ չի որոշել՝ որքան է կազմելու այդ գումարը:
2016թ. վերջին Ռուսաստանի և Իսրայելի քաղաքացիություն ունեցող բլոգեր Ալեքսանդր Լապշինը ձերբակալվել էր Մինսկում և արտահանձնվել Ադրբեջան, որտեղ նրան մեղադրում էին Արցախ այցելելու և հետո անօրինական ճանապարհով Ադրբեջանի տարածք մուտք գործելու մեջ: Բաքվի դատարանը նրան դատապարտել էր 3 տարվա ազատազրկման: Սակայն սեպտեմբերի 11-ին նա ազատ արձակվեց Ադրբեջանի նախագահի ներմամբ՝ այն բանից հետո, երբ նախորդ գիշերը դաժան ծեծի էր ենթարկվել բանտում:
Պատրաստեց՝ Վիկտորյա ԱՆԴՐԵԱՍՅԱՆԸ
