Այսօր կառավարության նիստին վարչապետ Կարեն Կարապետյանը հայտարարեց, որ կառավարությունը նախատեսում է նոր հավակնոտ հակակոռուպցիոն ռազմավարություն մշակել:
Վարչապետն անդրադառնալով 2015 թվականին ընդունված հակակոռուպցիոն ռազմավարությանը, ասաց, որ այս ժամանակահատվածում կառավարության նախաձեռնությամբ իրականացվել են մի շարք միջոցառումներ՝ ուղղված կոռուպցիայի դեմ պայքարին և կոռուպցիոն երևույթների կանխարգելմանը: Ռազմավարությունից բխող մի շարք միջոցառումներ, ինչպես ասաց վարչապետը՝ դեռևս ընթացքի մեջ են: Սակայն հարկավոր է այս փուլում ձեռնարկել միջոցառումներ՝ նոր հավակնոտ հակակոռուպցիոն ռազմավարություն մշակելու ուղղությամբ. «Զուգահեռ պետք է ներդնել նոր ռազմավարության կատարման մոնիթորինգի և արդյունքների գնահատման մեխանիզմներ»:
Վարչապետը հանրապետական գործադիր մարմինների ղեկավարներին հանձնարարեց սահմանված ժամկետներում ավարտին հասցնել գործող հակակոռուպցիոն ռազմավարությունից բխող անհրաժեշտ օրենսդրական փաթեթների մշակման և միջոցառումների կատարման աշխատանքները, ինչպես նաեւ 30-օրյա ժամկետում ըստ ոլորտների մշակել հակակոռուպցիոն նոր ռազմավարության վերաբերյալ առաջարկություններ և դրանք ներկայացնել արդարադատության նախարարություն:
Կարեն Կարապետյանը կառավարության աշխատակազմի ղեկավարին հանձնարարվեց 15-օրյա ժամկետում ավարտին հասցնել գործող 4 ոլորտային հակակոռուպցիոն միջոցառումների մոնիթորինգի և գնահատման մեխանիզմների մշակման աշխատանքները, սահմանված ժամկետում ամփոփել Հակակոռուպցիոն ռազմավարությամբ նախատեսված և իրականացված միջոցառումներն ու դրանց արդյունքները: Ըստ վարչապետի՝ պետք է նաև ներկայացնել ամփոփ տեղեկատվություն, ապահովելով դրա հասանելիությունը հասարակության լայն զանգվածներին:
Իսկ արդարադատության նախարարին վարչապետը հանձնարարեց նոր հավակնոտ հակակոռուպցիոն ռազմավարություն մշակելու ուղղությամբ հստակ արձանագրել թիրախային ոլորտները, մոնիթորինգային և գնահատման ցուցանշները, ինչպես նաև ներկայացնել կոնկրետ միջոցառումներ, որոնք ուղղված են կոռուպցիայի կանխարգելմանը և կոռուպցիոն հանցագործությունների քննության համակարգի արդյունավետության բարձրացմանը:
Վարչապետն ասաց, որ նոր փաստաթղթի մշակման աշխատանքներին պետք է հնարավորինս ներգրավել քաղաքացիական հասարակության ներկայացուցիչներին, գործարարներին, իրավաբաններին, գիտնականներին և այլ շահագրգիռ մարմիններին:
Նելլի ԲԱԲԱՅԱՆ
