Արտահանողների միության նախագահ Րաֆֆի Մխջյանի փոխանցմամբ՝ Լարսի անցակետում ռուս մաքսավորները շարունակում են կաշառք պահանջել՝ անտեսելով Հայաստանի ԵԱՏՄ անդամ լինելը։
Գործարարը պատմել է, որ վերջերս ստիպված է եղել անօրինական գումար վճարել սուրճը ռուսական շուկայում վաճառելու համար։ Նոյեմբերի 10-ին Լարսում ռուս մաքսավորները կնիքի դիմաց 5000 ռուբլի կաշառք են պահանջել, եւ բեռնատարի վարորդը միայն վճարելուց հետո է կարողացել անցնել սահմանը։
Լարսում տիրող իրավիճակի մասին տեղյակ է նաեւ Հայաստանում Ռուսաստանի առեւտրային ներկայացուցչության ղեկավար Անդրեյ Բաբկոն: Վերջինս ընդունել է, որ խնդիրն առկա է:
Նա ասաց, որ հայ արտահանողներն ու գործարարները իրեն նման խնդրով չեն դիմել. «Բայց եթե կան փաստեր, գրեք՝ մենք կօգնենք։ Կաշառք տալիս է նա, ով ինչ-որ խախտումներ է թույլ տալիս: Դա իմ անձնական կարծիքն է։ Իսկ եթե ամեն ինչ մաքուր է, լավ, ոչ ոք չի կարող ոչինչ ավելի պահանջել։ Բայց ամենակարեւորը ես կհորդորեմ՝ եթե կան այդպիսի դեպքեր, դրանց մասին պետք է խոսել բաց, հայտարարել, ֆիքսել, հասցնել դատարան, որպեսզի դադարեցվեն։ Դրանք գոյություն ունեն ամբողջ աշխարհում, դա կոռուպցիա է, որի դեմ պետք է պայքարել»։
Հոդվածն ամբողջությամբ կարդացեք «Հայոց Աշխարհ» օրաթերթի այսօրվա համարում
