ԵՊՀ դասախոս, կրոնագետ, աստվածաբան Վարդան Խաչատրյանը համոզված է, որ «Ընտանիքում բռնության կանխարգելման, ընտանիքում բռնության ենթարկված անձանց պաշտպանության եւ ընտանիքում համերաշխության վերականգնման մասին» օրենքի նախագիծը Հայաստանին պարտադրված է Եվրոպայից: Հիշեցնենք, որ օրերս Ազգային ժողովն առաջին ընթերցմամբ ընդունեց այն: «Առավոտ»-ի հետ զրույցում նա հարցադրում է անում. «Ինչպե՞ս եք վերաբերվում այն հանգամանքին, որ կինը կարող է հեռանալ ամուսնուց եւ ամիսներով ապրել ապաստարանում: Ընտանիքին դա նպաստո՞ւմ է, թե՞ ոչ: Օրինագծում կա «հոգեւոր բռնություն» հասկացությունը: Հոգեւոր բռնությունը ո՞րն է՝ երեխայի վրա խոսե՞լը, թե՞ կնոջ հետ բանավոր կոնֆլիկտը, որը չի կարող չլինել որեւէ ընտանիքում: Ցույց տվեք օրինագծի անհրաժեշտության հիմքը»:
Վարդան Խաչատրյանի խոսքով՝ պետք է ապացուցել, որ մինչեւ օրս, օրինակ, սպանություն կատարած կինը կամ ամուսինը չեն պատժվել, որ ընտանեկան բռնությունների թիվն ահագնացող մակարդակի է հասել, եւ նման օրինագիծն անհրաժեշտություն է: «Տեսնում ենք, չէ՞, որ չկա ապացույց»,- ասում է նա:
Լուսանկարը՝ ԼՈՒԻԶԱ ՍՈՒՔԻԱՍՅԱՆԻ
«Առավոտ»
13.12..2017
