ՀՀ Վարչական դատարանում այսօր պետք է հրապարակվեր քաղաքացիական ակտիվիստ, «Հայ կանանց ճակատ» ընդդիմադիր նախաձեռնության անդամ Գեղեցիկ Տոնոյանի գործով որոշումը:
Հիշեցնենք, որ ՀՀ Ոստիկանությունը պահանջում է ցուցարարին պատասխանատվության ենթարկել տուգանքի տեսքով՝ գտնելով, որ Գեղեցիկ Տոնոյանը 2016թ. մարտի 24-ին Մաշտոցի պողոտայում ի պաշտպանություն Գեւորգ Սաֆարյանի կազմակերպված հավաքի ժամանակ խոչընդոտել է վերջինիս բնականոն ընթացքին, այնուհետեւ՝ չի կատարել ոստիկանի՝ հավաքի բնականոն ընթացքը խոչընդոտող գործողությունները դադարեցնելու մասին պահանջը:
Գեղեցիկ Տոնոյանի շահերի պաշտպան, ՀՔԱ Վանաձորի գրասենյակի ներկայացուցիչ Տաթեւիկ Սիրադեղյանն Aravot.am-ին հայտնեց, որ այսօր դատարանի որոշում չի հրապարակվել, քանի որ դատարանը որոշում է կայացրել գործի վարույթը վերսկսելու մասին: «Դա նշանակում է, որ դատարանն անհրաժեշտ է համարել գործի համար նշանակություն ունեցող որոշ հանգամանքներ պարզել եւ այդ հիմքով վերսկսել դատաքննությունը»,-նշեց փաստաբանը:
Հետաքրքրվեցինք՝ նոր փաստե՞ր են ի հայտ եկել: Տաթեւիկ Սիրադեղյանն ի պատասխան հայտնեց, որ դատարանի որոշման մեջ նման մանրամասներ նշված չեն, ուստի դեռ պարզ չէ՝ արդյո՞ք նոր հանգամանքներ կան: Առաջիկա նիստը նշանակվել է փետրվարի 19-ին՝ ժամը 10.15-ին:
Լուիզա ՍՈՒՔԻԱՍՅԱՆ
