2016թ. Ոստիկանության ՊՊԾ գունդը գրաված եւ մի շարք ծանր հանցագործությունների մեջ մեղադրվող «Սասնա ծռեր» խմբի անդամների գործով այսօրվա դատական նիստում ամբաստանյալներն ընդհանուր հայտարարի չեկան առ այն, թե ցանկանո՞ւմ են ներկա լինել գործում առկա փաստաթղթերի հրապարակման փուլին:
Դատավոր Մեսրոպ Մակյանն ակնարկեց, որ ցանկացողները կարող են հեռանալ, բայց մնալը ողջունելի է, քանի որ կարեւոր դատավարական փուլում են: Դատախազներն էլ պնդեցին, որ ամբաստանյալների ներկայությունը պարտադիր է: Ամբաստանյալներն էլ հայտարարեցին, որ չեն ցանկանում գնալ:
«Դե հիմա կարող եք գնալ»,-կրկին ասաց դատավորը, սակայն նիստերի դահլիճը լքեցին միայն Արայիկ Խանդոյանը՝ «Միայնակ գայլը» եւ Մխիթար Ավետիսյանը: «Փոշմանեցինք»,-տեղից ասաց Գագիկ Եղիազարյանը: Ապացույցների հետազոտումը կշարունակվի հաջորդ նիստում:
Լուիզա ՍՈՒՔԻԱՍՅԱՆ
