Սյունիքի մարզի Մեղրի եւ Ագարակ համայնքները գազիֆիկացնելու համար կառավարությունը «Գազպրոմ Արմենիա» ընկերությանը կփոխհատուցի գույքով:
Ինչպես տեղեկանում ենք կառավարության վաղվա նիստի օրակարգից, նշյալ քաղաքները գազիֆիկացնելու համար կառավարությունը 1 միլիարդ 279 միլիոն 169 հազար դրամ արժողությամբ անորոշ ժամկետով, անհատույց օգտագործման իրավունքով կհանձնի գազամատակարար ընկերությանը` «Գազպրոմ Արմենիա»-ին: Գույքը պատկանում է էներգետիկ ենթակառուցվածքների և բնական պաշարների նախարարությանը:
«2013թ. օգոստոսի 26-ին ՀՀ էներգետիկայի և բնական պաշարների նախարարության աշխատակազմ պետական կառավարչական հիմնարկի եւ «Հայ Ռուսգազարդ» ՓԲԸ-ի միջեւ կնքվել է Հանձնարարության պայմանագիր, համաձայն որի Պայմանագրով սահմանված պատվիրատուի պարտավորությունների կատարումը` բացառությամբ վճարումների իրականացումը եւ դրա հետ կապված այլ պարտավորությունների կատարումը, դրվել է «Գազպրոմ Արմենիա» ՓԲԸ-ի վրա:
Ծրագրի շրջանակներում Մեղրի եւ Ագարակ քաղաքներում նախատեսված գազաֆիկացման աշխատանքներն ավարտվել են ամբողջությամբ, որի ընդհանուր հաշվեկշռային արժեքը կազմել է 1 279 169 136 ՀՀ դրամ:
Հաշվի առնելով նշված տարածքների գազամատակարարման կարևորությունը, անհրաժեշտ ենք համարում նշված գույքն՝ անհատույց օգտագործման իրավունքով տրամադրել «Գազպրոմ Արմենիա» ՓԲԸ-ին»,-ասված է էներգետիկ ենթակառուցվածքների եւ բնական պաշարների նախարար Աշոտ Մանուկյանի` կառավարություն ներկայացրած նախագծում:
Լուսինե ԲՈՒԴԱՂՅԱՆ
