2016թ. Ոստիկանության ՊՊԾ գունդը գրաված եւ մի շարք ծանր հանցագործությունների մեջ մեղադրվող «Սասնա ծռեր» խմբի անդամների գործով դատական նիստում այսօր սկսվեց գրավոր ապացույցների՝ փաստաթղթերի հրապարակման փուլը:
Ամբաստանյալներից Արայիկ Խանդոյանը խնդրանք ուղղեց դատավոր Մեսրոպ Մակյանին: «Որպես հայ եմ խնդրում՝ «ամբաստանյալ» բառը չօգտագործեք, մենք մեր ազգի պաշտպաններն ենք: Ինձ արդեն «հոգեկան» եք սարքել, էլ չեմ կարող ինձ տիրապետել: Ինձ չստիպեք «ցենզուրայից» դուրս գալ»: Դատավորը «Միայնակ գայլի» խնդրանքին ի պատասխան հորդորեց կոռեկտություն դրսեւորել:
Ապա ամբաստանյալներից Գագիկ Եղիազարյանը հայտարարեց, որ չի պատրաստվում բարբաջանք լսել ու հեռանում է նիստերի դահլիճից: Մեսրոպ Մակյանը նախազգուշացրեց, որ նման բան Եղիազարյանին չի թույլատրել, իսկ գրավոր ապացույցների հրապարակումը չի կարող «բարբաջանք» որակվել:
«Ինչ արել ենք, լավ ենք արել: Մենք զինված ապստամբություն ենք արել: Եթե մեր արածի հանգամանքները կարող ենք քննարկել, քննարկենք»,-շարունակեց Եղիազարյանը:
Դատավորը զգուշացրեց, որ սանկցիա կիրառի՝ նիստերի դահլիճից հեռացման տեսքով, սակայն Եղիազարյանն ասաց. «կիրառեք…բռնի ուժ կիրառեք, բայց ես չեմ նստելու»:
Մյուս ամբաստանյալները եւս ցանկություն հայտնեցին միանալու նրա որոշմանը: Իրավիճակը հանդարտեցնելու համար դատավորն ընդմիջում հայտարարեց:
Նիստերի դահլիճի ապակե պատնեշից այս կողմ գտնվող քաղաքացիներն էլ վիճաբանեցին դատական կարգադրիչների հետ:
Լուիզա ՍՈՒՔԻԱՍՅԱՆ
