Վերջերս Հ1-ով սկսել են մի քանի լավ հաղորդումներ ցուցադրել, որոնք կարելի է դիտել ընտանիքով: Հաղորդումներ, որոնք աստվածասիրություն ու հայրենասիրություն են դաստիարակում:
Դրանցից են, օրինակ, «Հավատի խորհրդավոր ուղին», «Ճանապարհ», «Կյանքը սահմանին» եւ նմանատիպ մի քանի այլ հաղորդումներ: Սրանք հաղորդումներ են, որ մեծերն ու փոքրերը կարող են դիտել միասին: Մենք ընտանիքով ենք դիտում:
Վերջերս էլ «Օրակարգից» հետո, դեռ չէի հասցրել անջատել հեռուստացույցը, մեկ էլ սկսվեց «Բացիր աչքերդ» հեռուստանովելը: Դիտեցի, հուզվեցի: Սիրտս վկայում է, որ ֆիլմ է երկիրը սիրելու, անձնվիրության (պապը, ով չէր ուզում թոռներին գիշերօթիկ տանել), պատասխանատվության, զղջումի ու միասին հայրենի տուն կառուցելու մասին: Ու այս ամենը արտագաղթի ֆոնի վրա: Երեւանն էլ շատ գեղեցիկ է պատկերված:
Սիրում եմ այսպիսի բաները: Երանի ավելի շատ լինեն նման հաղորդումներ, լրագրողներ, նկարահանողներ ու որոշում կայացնողներ: Լավ հաղորդումները, ֆիլմերն ու զրույցները պատասխանատվության, ներողամտության, զղջման, հայրենասիրության ու բարության մասին մեզ բոլորիս ավելի լավը կարող են դարձնել:
Համաձայն ձեր մասնագիտության, ձեզ տրված է ժողովրդի մեջ բարի բաներ տարածել, ու այդ իշխանությունը պետք է օգտագործել: Այն ժամանակ բռնությունն էլ կքչանա ընտանիքում, բարությունն ու սերն էլ կշատանա: Բարի երթ բոլորիս:
ԱՐՄԵՆ ՀԱՐԵՅԱՆ
«Առավոտ»
12.12..2017
