Այսօր Վանաձորում անցկացվեց «Խոսող գրադարան» նոր ձեւաչափով միջոցառումը: Այս ձեւաչափում, գրքերի փոխարեն մարդիկ են խոսում, իսկ ընթերցանությունը երկու եւ ավելի մարդկանց երկխոսությունն է։ «Խոսող գրադարան» միջոցառման նախաձեռնողները Վանաձորի պետական համալսարանի լրագրության 3-րդ կուրսի ուսանողներն են:
-Ես վերջերս Հոլանդիայում էի, եւ այնտեղ այս ծրագիրն ինձ ներկայացրեցին, եւ մտածեցի, որ Հայաստանում էլ պետք է նման ծրագիր անենք: Հայաստանում մի քանի ՀԿ-ներ արդեն իսկ անում են այս միջոցառումը: Սա նոր ֆորմատ է, մարդկանց բացահայտելու հետաքրքիր մի ձեւ: Մարդիկ՝ մենք բոլորս գրքեր ենք, եւ այստեղ գալիս ենք կարդալու,- Aravot.am-ի հետ զրույցում ասաց ՎՊՀ դասախոս, կազմակերպիչ Մանե Պապյանը:
Կազմակերպիչները խոստանում են՝ ծրագիրը կլինի շարունակական, ոչ միայն Վանաձորում, այլեւ Վանաձորի սահմաններից դուրս:
-Սա նորամուծություն է մեր քաղաքում, եւ այսպես լայն մասշտաբով առաջին անգամն է կազմակերպվում: Մենք ունենք շատ հետաքրքիր մարդ-գրքեր: Ընթերցողները փորձում են հարցերի միջոցով մարդկանց կարդալ,-ասում է ՎՊՀ ուսանողուհի Սերինե Սերոբյանը:
«Խոսող գրադարանի» «գրքերն» ամենատարբեր մարդիկ են՝ խաչքարագործից մինչեւ քաղաքական գործիչ, ռոք երաժշտից մինչեւ ՀԿ ներկայացուցիչ:
«ԷԽՈ» ՀԿ նախագահ Սերյոժա Օհանջանյանն այս միջոցառմանը մասնակցելու համար Երեւանից է եկել: Հանդես է գալիս « խոսող գրքի» դերում. «Նման ֆորմատի բանաձեւը ոչ ֆորմալ կրթության մեխանիզմով շատ կարեւոր է, քանի որ հասարակության տարբեր անդամներ կարողանում են քեզ հարցեր տալ եւ հարցերի պատասխաններն անմիջապես ստանալ: Հուսով եմ, որ շարունակական կլինի, եւ նման ձեւաչափով հանդիպումներ կունենանք նաեւ Երեւանում»:
Վանաձորցի երիտասարդ Վահեի համար, այս ձեւաչափը եւս մեկ հնարավորություն է բացահայտելու ծանոթ ու անծանոթ մարդկանց կյանքի էջերը, նրանցից նաեւ նոր բաներ սովորել. «Ձեւաչափը հետաքրքիր է, քանի որ այն Վանաձորում այդքան էլ տարածված չէ: Հետաքրքիր է նաեւ լսել տարբեր մարդկանց պատմություններն ու տեսակետները: Սա նաեւ հնարավորություն է, որ այն մարդկանց, որոնց որ ճանաչում ենք, կամ մտածում ենք, որ ճանաչում ենք, իրենց, իրենց անցած ճանապարհի մասին նոր բան իմանանք»:
Տաթեւիկ ՂԱԶԱՐՅԱՆ
