Շենգավիթի նախկին դատավոր, կաշառք պահանջելու ու ստանալու համար մեղադրվող Իշխան Բարսեղյանի որդին հոգեկան առողջության հետ կապված խնդիրներ չունի: Այս մասին Aravot.am-ին հայտնեց Իշխան Բարսեղյանի պաշտպան՝ փաստաբան Վարդուհի Էլբակյանը:
Հիշեցնենք, որ Իշխան Բարսեղյանի որդին՝ Ռազմիկ Բարսեղյանը, «ՉԻ» աղբյուրների փոխանցմամբ, այժմ ԶՈւ Կանազի հոսպիտալում է, նա հոգեկան խանգարում է ստացել բանակում՝ ԼՂՀ Մարտունի-3 զորամասում, որտեղ ժամկետային զինծառայող էր:
«Այո՛, Իշխան Բարսեղյանի որդին հիմա գտնվում է հոսպիտալում, բայց դա ոչ թե հոգեկան խնդիրների հետ է կապված, այլ ֆիզիկական առողջական խնդիրների: Այն, որ երիտասարդը խնդիրներ է ունեցել բանակում ու դրա հետ կապված հոգեկան խնդիրներ են առաջացել, դրա վերաբերյալ որեւէ տեղեկատվության ես չեմ տիրապետում, բացի այդ իր հարազատներից էլ չեմ լսել, որ որդին նման խնդիրներ է ունեցել, որն առաջացել է բանակում»,- Aravot.am-ին ասաց Վարդուհի Էլբակյանը:
Aravot.am-ը երիտասարդի առողջական խնդիրների մասին հետաքրքրվեց նաեւ ՊՆ-ից, որտեղից խոստացան տեղեկություններ ճշտել ու տրամադրել վաղը:
Արփինե ՍԻՄՈՆՅԱՆ
