Հայ փախստականների «Ահազանգ» ՀԿ նախագահ Գրիշա Օգանեսովը Սումգայիթի ջարդերից քսանինը տարի անց չի մոռացել հայերի նկատմամբ ցեղասպանական գործողությունների մանրամասները:
Ըստ նրա՝ Սումգայիթին զուգահեռ ջարդեր էին սկսվել Կիրովաբադում, բայց այստեղ ջարդերը կարճ տեւեցին:
«Պատրաստ չէին, դա երեւի փորձ էր, տեսնեն՝ ինչ կստացվի, դռներն ու պատուհաններն էին ջարդում: Փետրվարից սկսած մինչեւ նոյեմբերի կեսերը պատրաստվում էին, որ նույն սցենարը կրկնեն Կիրովաբադում»,- այսօր «Նոյան տապան» ակումբում հիշում էր Օգանեսովը՝ պնդելով, որ հայերի նկատմամբ ջարդերը պետական մակարդակով կազմակերպված էին, որովհետեւ ինքը լավ է հիշում՝ ինչպես հրապարակից ադրբեջանցի երիտասարդները դուրս եկան՝ ուղղվելով դեպի հայաբնակ բնակավայրերը՝ ոստիկանների ուղեկցությամբ:
«Այդ օրվանից զգացինք, որ վատ է լինելու, չնայած մեկ է ժողովրդի սրտում կար, որ Սումգայիթի դեպքերը նորից չեն կարող կրկնվել»,- շարունակեց բանախոսը:
Ըստ նրա՝ նոյեմբերի քսաներկուսից մի քանի հարյուրի հասնող հայեր հավաքվել էին եկեղեցու մոտ՝ որոշելու ինքնապաշտպանական ինչ ձեւերի են դիմելու ու հենց այդ օրերին էր, որ եկեղեցի էին գալիս թուրքական բնակավայրերի հայեր՝ ապաստան խնդրելու, առաջինը հենց նրանց վրա են թուրքերը հարձակվել. «Հենց այդ գիշերվանից էլ սկսեց ցեղասպանությունը»:
Պարոն Օգանեսովի խոսքով, այդ ջարդերից հետո Ադրբեջանի տարածքում ոչ մի հայ չմնաց, բոլորը դուրս եկան:
Արփինե ՍԻՄՈՆՅԱՆ
