«Նաիրիտ» գործարանի եղած մասնագետները ծերանում են, երիտասարդներն էլ հանրապետությունից գնում են»,-Aravot.am-ի հետ զրույցում այսպիսի մտահոգություն հայտնեց «Նաիրիտ« գործարանի արհմիության նախագահ Հրաչ Թադեւոսյանը:
Ըստ նրա, եթե որոշեն «Նաիրիտը» վերագործարկել, երկու-երեք տարի հետո ոչ մի մասնագետ չի լինելու. «Նաիրիտում» շարքային մասնագետ-բանվոր պատրաստելու համար առնվազն հինգ տարի է պետք»:
Պարոն Թադեւոսյանի խոսքով մեկ շաբաթ առաջ դատարանի որոշմամբ պարտք մնացած գումարները` մոտ 300 միլիոն դրամ, տրամադրվեց գործարանի նախկին աշխատակիցներին եւ այժմ պարտք ու պահանջ չկա, սակայն գործարանի վերագործարկման հարցը օրակարգում է: Աշխատակիցները ամեն շաբաթ կառավարության առաջ բողոքի ցույց են անում` պահանջելով գործարանն աշխատեցնել: Նրանք տարիներ առաջ գործարանի համար առողջացման ծրագիր էին ներկայացրել, սակայն, ինչպես պարոն Թադեւոսյանն ասաց, կառավարությանն այն չհետաքրքրեց:
«Նաիրիտն» այս կառավարության խելքի բանը չէ: Կառավարությունում ինժեներներ չկան նստած, այդ պատճառով էլ «Նաիրիտը» տանում են կործանման: Գործարանը սնանկացման է գնում, երկու տարի հետո եղած-չեղածը կվաճառեն ու վերջ»,- ասաց նա:
Հրաչ Թադեւոսյանը գտնում է, որ «Նաիրիտը» միանգամայն ենթակա է վերագործարկման: Ըստ նրա, գործարանի մասնագետները հաշվարկել են ու պարզել, որ գործարանի վերաբացման համար 80 միլիոն դոլար կպահանջվի: Մինչդեռ կառավարությունն այդ ծրագիրն իրատեսական չի համարում.
«Նաիրիտի» արտադրանքը միշտ էլ մրցունակ է եղել եւ իրացման խնդիր երբեք էլ չի եղել: Եթե պահեստում ապրանք է եղել, ապա, այսպես ասած, սակարկել են` էժանով տան, թե՞ թանկով»:
Մեր հարցին, թե Եվրոպական հայերի ֆորումի նախագահն էր պատրաստակամություն հայտնել փուլ առ փուլ ներդրումներ անել եւ գործարանը ոտքի կանգնեցնել, ինչո՞վ ավարտվեց այդ նախաձեռնությունը, պարոն Թադեւոսյանը պատասխանեց` կառավարությունը չցանկացավ այդ ներդրողի հետ աշխատել:
Գործարանի նախկին աշխատակիցները «Նաիրիտը» վերագործարկելու պահանջով ցույցերը շարունակելու են, չնայած, որ օր օրի, ինչպես պարոն Թադեւոսյանն է ասում, նրանց շարքերն էլ նոսրանում են:
Լուսինե ԲՈՒԴԱՂՅԱՆ
