ՀՀ սպորտի եւ երիտասարդության հարցերի նախարար Հրաչյա Ռոստոմյանը եւ ՀՀ վարչապետի ավագ օգնական Արամ Վարդեւանյանը հանգստյան օրերին այցելեցին Աբովյան եւ Սեւան քաղաքների բարեկարգված եւ պարզագույն մարզասարքերով համալրված բակեր:
Աբովյանի քաղաքապետարանում նրանք հանդիպեցին մարզաշխարհի պատասխանատուներին, մարզադպրոցների տնօրեններին եւ մարզիչներին, լսեցին նրանց հուզող խնդիրները: Նախարար Հրաչյա Ռոստոմյանը նրանց հետ քննարկեց բարձրացված հարցերը եւ խոստացավ շատ արագ լուծումներ գտնել այն առաջարկներին, որոնց լուծումն իր իրավասության ներքո է: Նախարարն ու վարչապետի ավագ օգնականը, օգտվելով առիթից, ունակությունները ցուցադրեցին իրենց նախասիրած մարզաձեւերում:
Այնուհետեւ պարոնայք Ռոստոմյանն ու Վարդեւանյանը եղան Գագիկ Ծառուկյանի անվան մարզադպրոցում, ֆիթնես ակումբներից մեկում, քաղաքի 3-րդ միկրոթաղամասի վերակառուցված մարզական բակերից մեկում:
Հաջորդ կանգառը Սեւան քաղաքի 5-րդ միկրոթաղամասի բազմաֆունկցիոնալ մարզական բակում էր, որտեղ ստեղծված պայմանները շրջակա շենքերի բնակիչներին հնարավորություն են ընձեռում զբաղվել ոչ միայն անհատական մարզումներով, այլեւ խաղային մարզաձեւերով:
ՀՀ վարչապետ Կարեն Կարապետյանի հանձնարարությամբ «Բակային սպորտի զարգացման» հայեցակարգի իրագործման շրջանակներում այս տարի հանրապետության տարբեր մարզերում բարեկարգվել եւ պարզ մարզասարքերով համալրվել է հիսունից ավելի բակ:
Աշոտ ՀԱԿՈԲՅԱՆ
