ԱՄՆ նախագահ Դոնալդ Թրամփի հայտարարությունը, որով վերջինս Երուսաղեմը ճանաչում է որպես Իսրայելի մայրաքաղաք, փաստում է, թե իսրայելապաղեստինյան հակամարտության համատեքստում որ կողմն է առավել շահավետ դիրքերում. այս առումով Իսրայելն արտաքին քաղաքականության հաջողություն գրանցեց: «Նոյյան տապան» լրատվական գործակալությունում լրագրողների հետ հանդիպմանն այսօր նման տեսակետ հայտնեց «Նորավանք» գիտակրթական հիմնադրամի վերլուծաբան Կարեն Վերանյանը:
Նրա դիտարկմամբ՝ Թրամփի հայտարարությունը բխում է Իսրայելի շահերից, որը վարում էր Երուսաղեմը որպես իրենն ամրագրելու քաղաքականություն: Ըստ փորձագետի՝ նման քայլով ԱՄՆ-ն որոշակիորեն իրեն մեկուսացրեց միջազգային հանրությունից. «Չեմ կարծում, որ Թրամփի քայլը ԱՄՆ դիվանագիտության համար հաղթանակ է: Այս դեպքում ավելի շատ գործ ունենք Թրամփի միանձնյա որոշման հետ»:
Կարեն Վերանյանի խոսքով՝ Իսրայելի եւ Պաղեստինի միջեւ ռազմական բախումները ակտիվ կլինեն այնքան ժամանակ, քանի դեռ ԱՄՆ-ն չի հնչեցրել հավասարակշռված քաղաքական-իրավական գնահատական եւ չի փորձել հանդարտեցնել իրավիճակը:
«Ուշադիր պետք է լինենք Երուսաղեմի հայ համայնքի եւ հայկական մշակութային ժառանգության հանդեպ: Իսրայելի հետ հարաբերություններում Հայաստանը պետք է որդեգրի ճկուն եւ զգուշավոր դիվանագիտություն՝ հայկական համայնքի անվտանգությունն ապահովելու նպատակով»:
Լուիզա ՍՈՒՔԻԱՍՅԱՆ
